महिला अउ बाल विकास मंत्री ह सबो अभिभावक मन ले आंगनबाड़ी केन्द्र म अपन लइका मन के वजन कराए के अपील करिन
रायपुर, लइका मन म कुपोषण के स्तर जांचे अऊ सुपोषण के प्रति समुदाय म जागरूकता लाय बर आज प्रदेश के सबो आंगनबाड़ी मन म वजन त्यौहार शुरू करे गीस। ये बेरा म स्थानीय जनप्रतिनिधि अऊ पालक मन के उपस्थिति म आंगनबाड़ी मन म लइका मन के वजन अऊ ऊंचाई लेहे गीस। ए आधार म लइका मन के उमर के आधार म ऊंखर पोषण स्तर के निर्धारण होही। आज ले शुरू होए वजन त्यौहार के आयोजन 13 अगस्त तक करे जाही।
महिला अउ बाल विकास मंत्री श्रीमती भेंड़िया ह वजन त्यौहार म सबो अभिभावक मन ले आंगनबाड़ी केन्द्र म अपन लइका मन के वजन कराए के अपील करे हें। उमन कहिन कि लइका मन के सुपोषण बर ऊंखर वजन के जानकारी होना जरूरी हे। लइका मन ल पौष्टिक आहार देवत ऊंखर विकास के मॉनिटरिंग करना हे। सामुदायिक सहभागिता ले सुपोषण के प्रति जागरूकता लाय के जरूरत हे।
वजन त्यौहार म हर एक परिवार ल ऊंखर लइका मन के सही पोषण स्थिति ले अवगत करात हर एक गांव म कम वजन वाले लइका मन के चिन्हारी करके कुपोषण के सही स्थिति के पता लगाए जाही। कुपोषण के सही स्थिति ल जानके हर एक लइका के जानकारी सॉफ्टवेयर म दर्ज करके राज्य म कुपोषित लइका मन के स्थिति के डाटाबेस तियार करे जाही। राज्य के हर एक केन्द्र, ग्राम पंचायत, विकासखंड म कुपोषण के अभी हाल स्थिति के समीक्षा करत कुपोषण कम करे कार्ययोजना तियार करे जाही। वजन त्यौहार के माध्यम ले कोनो क्षेत्र विशेष, वर्ग विशेष म कुपोषण के पहिचान करे म मदद मिलही अऊ स्पष्ट हो सकही कि कोन स्थान मन म अऊ कोन कारण ले कुपोषण जादा हे। एखर माध्यम ले विशिष्ट कार्ययोजना बनाय जा सकही। कुपोषण के रोकथाम बर संचालित योजना मन के क्रियान्वयन बर बेसलाईन सर्वे अऊ लक्षित लइका मन के चिन्हांकन करे जाही।