श्रम विभाग के कल्याणकारी योजना मन के लाभान्वित होवत हें महिला मन

रायपुर, छत्तीसगढ़ श्रम कल्याण मंडल अपन स्थापना के समय ले ही प्रदेश भर म संचालित श्रम कल्याण केन्द्र मन के माध्यम ले जिहां मजदूर मन ल मंडल कोति ले संचालित चउदा योजना मन के लाभ देवत आवत हे, उहें सिलाई-कढ़ाई प्रशिक्षण के माध्यम ले सैकड़ों मजदूर परिवार के महिला मन ल आर्थिक आजादी प्रदान कर चुके हे। हाले म श्रम कल्याण मंडल के अध्यक्ष श्री योगेश दत्त मिश्रा ह रायपुर अउ राजनांदगांव जिला के श्रम कल्याण केन्द्र मन के दौरा करिन।
श्री मिश्रा ह पाछू छै महीना म प्रशिक्षित बैच ल प्रमाणपत्र बांटत कहिन के श्रम कल्याण मंडल कारखाना, उद्योग, फैक्ट्री अऊ 10 या 10 ले जादा नियोजित श्रमिक के संस्थान म कार्यरत श्रमिक मन के सामाजिक सुरक्षा बर व्यापक कार्य करत हवय। मंडल ह अब तक छात्रवृत्ति योजना के माध्यम ले निःशुल्क सिलाई मशीन वितरण योजना, निःशुल्क साइकिल वितरण योजना के माध्यम ले अऊ बीमारी, दुर्घटना अउ मृत्यु तक के योजना के माध्यम ले हजारों श्रमिक मन ल लाभान्वित करे हे।
मंडल के अध्यक्ष श्री मिश्रा ह कहिन के मजदूर परिवार मन के आर्थिक विकास होवय, उमन ल सामाजिक सुरक्षा के तमाम योजना मन के लाभ मिलय, एकर बर मंडल अऊ ओखर कर्मचारी मन काम करत हें। उमन देश के आर्थिक विकास के बात करत कहिन के प्रधानमंत्री श्री नरेन्द्र मोदी अऊ छत्तीसगढ़ प्रदेश के मुख्यमंत्री श्री विष्णु देव साय देश अऊ प्रदेश ल आर्थिक मजबूती के दिशा म कारगर काम करत हें।
श्री मिश्रा ह ए बेरा रायपुर जिला के उरला, सांकरा, सोनडोंगरी औद्योगिक क्षेत्र म कार्यरत श्रम कल्याण केंद्र मन के जांच करिन। उमन राजनांदगांव जिला के तुमडीबोड, टेडेसरा औद्योगिक क्षेत्र भी गीन, जिहां श्रम कल्याण केंद्र मन के जांच के बाद प्रमाणपत्र के वितरण करिन। उंखर संग मंडल के कर्मचारी विवेक दुबे, दुष्यंत साहू, गोपाल साहू, नरेंद्र सिन्हा उपस्थित रहिन।