- ड्वेन ब्रावो पहुंचिन पाहंदा, गौठान म स्वसहायता समूह के महिला मन ले करिन बातचीत
- महिला मन ह ब्रावो ल बताइन के कइसे उमन गौठान के माध्यम ले बढ़त हें आर्थिक सशक्तिकरण कोति
रायपुर, वेस्ट इंडीज क्रिकेट टीम के पहिली कप्तान ड्वेन ब्रावो आज दुर्ग जिला के पाटन ब्लाक के पाहंदा पहुंचिन। उमन इहां के गौठान म स्वसहायता समूह ले जुड़े महिला मन ले चर्चा करिन। महिला मन ह ब्रावो ल बताइन कि कइसे उमन गौठान के माध्यम ले ऊंखर बर आर्थिक सशक्तिकरण के अवसर खुले हे। ब्रावो के संग दुभासिया घलोक आए रहिस, जेकर माध्यम ले ओ मन अपन बात महिला मन ले करत रहिन। ब्रावो ह महिला मन ले कहिन कि उंखर ये सोच हे कि दुनिया महिला मन के तरक्की ले आगू बाढ़य। दुनिया ल आगू बढ़ाना हे त महिला मन ल अपन पांव म खड़ा करना होही। ओ मन ल अइसन अवसर देना होही जेखर से ओ मन आर्थिक रूप ले सशक्त होवयं। उमन कहिन कि आर्थिक रूप ले सशक्त होए बर आजीविकामूलक गतिविधि मन ल अपनाना होही।
श्री ब्रावो ल महिला मन ह बताइन कि गौठान के माध्यम ले हमला ये अवसर मिले हे। इहां अड़बड़ अकन पशु आथें, जेकर गोबर ले ओ मन कंपोस्ट खाद के निर्माण करत हें। ब्रावो ह कहिन कि दुनिया भर म जैविक खेती बर मनखे आगू बढ़त हें। आप मन इहां एला अपनावत हव ये बहुत अच्छा हे। उमन कहिन कि आप मन अइसन संसाधन मन के संग काम करत हव जऊन आप मन के बीच के ही हे। ब्रावो ह महिला मन ल बताइस कि ओखर इहां आए के मकसद अइसन महिला मन ले मिलना रहिस जऊन अपन पांव म खड़ा होए बर आर्थिक अवसर के तलाश म घर ले निकलत हें। आप मन से मिले मैं ह अपन देस ले अतीक दूरिहा आप मन तीर आए हंव। आप मन से मिलके मोला बहुत खुशी होइस हे। आप मन ह मेरा अतका अच्छा स्वागत करेव, एखर से मैं अभिभूत हंव। ये मौका म जिला पंचायत सीईओ श्री कुंदन कुमार घलोक उपस्थित रहिन। उमन ब्रावो ल पाहंदा स्थित गौठान के बारे म बताइन। उमन बताइन कि ये गौठान नरवा, गरवा, घुरूवा, बाड़ी योजना अंतर्गत बनाए गए हे जऊन प्रदेश सरकार के योजना हे। ये योजना के माध्यम ले गोवंश के संवर्धन बर काम करे जात हे ताकि पशुधन के उचित दोहन के माध्यम ले किसान मन के आय घलोक बढ़ाए जा सकय अऊ प्राकृतिक संसाधन मन के उपयोग करत किसान स्वयं अपन आय बढ़ा सकयं। एखर बर गाय मन बर उपयुक्त चारा के उपलब्धता के संगेच नाला मन के जीर्णोद्धार घलोक करे जात हे। संगेच साग-भाजी के उत्पादन बर बाड़ी आदि घलोक लगाए जात हे। ए तरा ले ग्रामीण अर्थव्यवस्था ल संपूर्ण रूप ले गति देहे बर ये योजना चलाए जात हे। ब्रावो ह ये उदीम ल सहराइन।