- महिला मन ल व्यक्तिगत स्वच्छता बर जागरूक बनाए के वैश्विक स्तर म संचालित प्रोजेक्ट ले जुड़े हे श्री ब्रावो
- श्री ब्रावो पाटन अऊ बस्तर के स्वसहायता समूह मन ल दान करहीं 20 सैनेटरी पैड मशीन
रायपुर, मुख्यमंत्री श्री भूपेश बघेल ले आज इहां ऊंखर रायपुर निवास म वेस्टइंडीज क्रिकेट टीम के पहिली कप्तान ड्वेन ब्रावो ह सौजन्य मुलाकात करिन। मुख्यमंत्री ह श्री ब्रावो ल चिनहा प्रदान करके उंखर स्वागत करिन। श्री ब्रावो ह श्री बघेल ल क्रिकेट के बैट भेंट करिन।
श्री ब्रावो एक डॉक्यूमेंट्री प्रोजेक्ट ‘मेन टेक लीड‘ ले जुड़े हें। ये प्रोजेक्ट कॉर्पोरेट सामाजिक उत्तरदायित्व (सीएसआर) कार्यक्रम के तहत वैश्विक स्तर म संचालित करे जात हे, जेखर तहत दूरस्थ वनांचल मन म कठिन परिस्थिति मन म रहत महिला मन म स्वच्छता अउ मासिक धर्म के समय स्वास्थ्य प्रबंधन के प्रति जागरूक करे के काम करे जात हे। ये प्रोजेक्ट के अंतर्गत महिला स्वसहायता समूह मन ल सैनिटरी पैड बनाए वाले मशीन प्रदान करे जात हे, जेखर से ए महिला मन ल आजीविका के साधन मिल सकय।
श्री ब्रावो ह मुख्यमंत्री श्री बघेल ल बताइस कि ओ ह मेन टेक लीड प्रोजेक्ट के तहत ग्रामीण छत्तीसगढ़ खासकर पाटन अऊ बस्तर क्षेत्र म महिला स्वसहायता समूह मन ल 20 मशीन दान म देना चाहत हें। मुख्यमंत्री ह महिला सशक्तिकरण के ये अभियान के सराहना करत श्री ब्रावो ल ये बने काम बर धन्यवाद दीन।
श्री ब्रावो ह बताइस कि चैरिटी के काम बर श्री अरुणाचलम मुरुगनांथम (पैडमैन) के संग ओ मन फरवरी आखरी म फेर छत्तीसगढ़ आहीं। कम लागत वाले सैनिटरी पैड बनइया मशीन के अविष्कार करइया पैडमैन के नाम ले मशहूर पद्मश्री अरुणाचलम मुरुगनांथम ल घलोक ये अभियान म जोड़े जात हे। ये पहल छत्तीसगढ़ म महिला मन ल सेनेटरी नैपकिन के निर्माण के संग आजीविका बर घलोक उपयोगी साबित होही।
