चीन चमगेदरी, कुकर अऊ बिलई संग कई प्रकार के जानवर मन ल भोजन के रूप म उपयोग करथे। ओखर बाजार म ए चित्र-विचित्र जानवर मन के मांस खुलेआम बिकथे। कोरोना संकट के बाद अब चीन म फेर ये जिंदा जानवर मन ल खाद्य बाजार मन म बिक्री बर सजा देहे गए हे। डेली कॉलर के मुताबिक चीन ह हाल ही म कोरोनो वायरस ऊपर जीत पाय हे अऊ लंबा लॉकडाउन के बाद इंहा के बाजार फेर खुले हे। डेली मेल के संवाददाता मन के मुताबिक, बिलई अऊ कुकर मन के संग पूजवन के अगोरा करत बहुत अकन जानवर मन के पिंजरा फेर चीनी खाद्य बाजार मन म दिखे लगे हे।
बिजनेस इनसाइडर के मुताबिक, गंदा जघा म चमगेदरी अऊ आन जिंदा जानवर मन के बेचे के सेती कोरोनो वायरस इंकर माध्यम बने रहिस। ए बात के पता चले के बाद चीन ह जनवरी म अपन बाजार मन ल बंद करे के आदेश दे रहिस।
डेली मेल के संवाददाता ह बताइस हे के ”अब बाजार ठीक वइसनहे काम चलत हे जइसे कोरोनो वायरस के संक्रमण के पहिली चलत रहिस। अंतर केवल ये हे के अब उँहा के सुरक्षा गार्ड मन फोटू लेहे ले रोकत हें जऊन पहिली कभू नई रोकत रहिन।” चमगेदरी, सांप, मेकरा, नप्पली, टेटका अऊ बिच्छी अब बाजार म सज गे हे अऊ मनखे मन ह पारंपरिक चीनी खाद्य पदार्थ के फोटू सोशल मीडिया म प्रसारित करना घलोक शुरू कर देहे हें।
