शिकार के पहिली तीन शिकारी गिरफ्तार, वन विभाग के बड़का कार्रवाई

बलौदाबाजार, वन मंत्री श्री केदार कश्यप के हुकुम के मुताबिक वन्य प्राणी मन के संरक्षण अऊ संवर्धन के दिशा म सख्त कार्रवाई करत बलौदाबाजार वनमण्डल ह शिकार के एक बड़का साजिश ल विफल करे हे। वनमण्डलाधिकारी बलौदाबाजार श्री धम्मशील गणवीर ह बताइस के देवपुर वन परिक्षेत्र के टीम ह 31 अगस्त 2025 के रात कसौंदी बीट म गश्त के समय शिकार के योजना बनात तीन आरोपी मन ल रंगेहाथ गिरफ्तार करे गीस। ये आरोपी विद्युत जीआई तार ल 11 केवी लाइन ले जोड़के वन्य प्राणी मन के शिकार करे के कोसिस करत रहिन। ए आरोपी मन ले मौका म जीआई तार, दवइ के खाली सीसी, लकड़ी के खूंटी, प्लास्टिक कवर पाइप अऊ बांस के डंगिनी जइसे सामान जब्त करे गीस।
वनमण्डलाधिकारी बलौदाबाजार श्री धम्मशील गणवीर ह बताइस के ये सफलता विगत दिन आयोजित बैठक अऊ रात्रिकालीन गश्त के सुदृढ़ व्यवस्था के परिणाम हे। उमन कहिन के ए जल्दी कार्रवाई म संभावित शिकार ल रोके गीस, जेखर जम्‍मो श्रेय वन विभाग के सजगता अऊ तत्परता ल जाथे।
गिरफ्तार आरोपी मन म बालाराम बरिहा (50 वर्ष), गणेशराम बरिहा (28 वर्ष) अऊ गुनसागर बरिहा (51 वर्ष) सबो ग्राम कुम्हारी, थाना राजादेवरी, जिला बलौदाबाजार रहवइया हे। ए आरोपी मन के विरुद्ध वन्यजीव संरक्षण अधिनियम 1972 अऊ संशोधित अधिनियम 2022 के धारा मनके अंतर्गत अपराध दर्ज करके ओ मन ल जेल भेज दे गए हे।
वन मंत्री श्री केदार कश्यप के निर्देश के परिपालन म ये कारवाई होए हे उमन वन विभाग के टीम ल बधाई देवत कहिन के ए प्रकार के कार्रवाई ले वन्य प्राणी मन के सुरक्षा ल अऊ मजबूती मिलही। उमन आमजनता अऊ युवा मन ले अपील करे हें के वन्यजीव मन के रक्षा म वन विभाग के सहयोग करव अऊ कोनो घलोक प्रकार के संदिग्ध गतिविधि के तुरंत सूचना विभाग ल देवव।