कई बछर बाद आम मनखे मन बर फेर खुलीस मुख्यमंत्री के दरवाजा

रायपुर, 28 जून 2024। कई बछर के अगोरा के बाद छत्तीसगढ़ के मुख्यमंत्री-निवास के दरवाजा काली आम-नागरिक मन बर खुल गे। काली के जइसे अब हर हफ्ता, बिरसपत के रोज, ये दरवाजा अइसनहे खुले रइही। ए खास दिन म आम-औ-खास, कोनो नागरिक, मुख्यमंत्री श्री विष्णुदेव साय ले मुलाकात कर सकही।
दरअसल, मुख्यमंत्री के ही इच्छा के मुताबिक छत्तीसगढ़ शासन ह आज ले एक खास कार्यक्रम- जनदर्शन – के दुबारा आगाज कर देहे हे। आम नागरिक मन ले सीधा मुलाकात अऊ सीधा गोठ के ए कार्यक्रम के फार्मेट अइसन हे कि मुख्यमंत्री निवास म सहज वातावरण म मनखे अपन बात ल मुख्यमंत्री के आगू रख सकत हे। ओ मन अपन शिकायत, समस्या, अपेक्षा अऊ सुझाव आसानी ले मुख्यमंत्री तक पहुंचा सकत हें। एक सादा टेबल के एक कोति मुख्यमंत्री के कुर्सी होथे अऊ दुसर कोति फरियादी। आस-पास ही मुख्यमंत्री के सचिवालय के अधिकारी मन संग राज्य के वरिष्ठतम अधिकारी मुख्यमंत्री के निर्देश के परिपालन बर मुस्तैद खड़े होथें। शिकायत अऊ सुझाव मन ल बकायदा रजिस्टर्ड करे जात हे, नागरिक मन ल टोकन देहे जात हे, ताकि शासन के कार्यवाही के मॉनिटरिंग करे जा सकय अऊ आवेदक घलोक समय-समय म प्रगति के जानकारी प्राप्त कर सकय। एखर बर बकायदा एक पोर्टल तैयार करे गए हे, जेमां टोकन नंबर दर्ज करतेच प्रगति के जानकारी आवेदक के आगू होथे।