सबो पंजीकृत किसान मन ले खरीदबो धान, बेफिकर रहव किसान: श्री भूपेश बघेल

रायपुर, प्रदेश म धान खरीदी तेजी ले होवत हे, अब तक करीबन 58 प्रतिशत किसान मन के धान खरीदे जा चुके हे, हम सबो पंजीकृत किसान मन ले धान खरीदे बर प्रतिबद्ध हे। मुख्यमंत्री श्री भूपेश बघेल ह ये बात दुर्ग जिला के पाटन ब्लॉक के जामगांव-आर म आयोजित बाबा गुरु घासीदास जयंती समारोह म कहिन। मुख्यमंत्री ह ये मौका म कहिन कि सबो सोसाइटी म किसान मन बर धान खरीदी के अच्छा प्रबंध करे के निर्देश देहे गए हे अऊ एखर इर बेहतर व्यवस्था बनाए गए हे। उमन कहिन के पाछू साल 92 लाख मीट्रिक टन धान खरीदी होए रहिस, ये साल एक करोड़ मीट्रिक टन धान खरीदी के संभावना हे। उमन कहिन कि देश भर म डीएपी के संकट हे अऊ छत्तीसगढ़ म ये संकट ले निपटे बर वर्मी कंपोस्ट अउ सुपर कंपोस्ट के निर्माण ल बढ़ावा देहे के बड़का लाभ होय हे। मुख्यमंत्री ह उहां मौजूद किसान मन ले वर्मी कंपोस्ट ले आए उत्पादन के बारे म पूछिन। किसान मन ह बताइस कि वर्मी कंपोस्ट ले अच्छा फसल होए हे, फसल के चमक घलोक अच्छा हे।
मुख्यमंत्री ह कहिन के छत्तीसगढ़ ह पूरा देश म गोधन न्याय योजना के माध्यम ले मिसाल स्थापित करे हे। ये पईत राजपथ म छत्तीसगढ़ के गोधन न्याय योजना के अनुपम झांकी घलोक दिखही अऊ प्रदेश म होवत कृषि ले संबंधित नवाचार मन के झलक घलोक देखे ल मिलही। मुख्यमंत्री ह कहिन कि पहिली गोबर सिरिफ लीपे के काम आत रहिस, अब ये पोते के काम घलोक आही। गोबर ले पेंट बनाए बर काम चलत हे। एखर अलावा गांव म गोबर के माध्यम ले बिजली के उत्पादन घलोक होही। एखर बर बाहिर के विशेषज्ञ लउहे आहीं अऊ ये म तकनीकी रूप ले काम आगू बढ़ही।