लइका मन ले अकेला मुलाकात करके जानिन उंखर समस्या अऊ मांग
परिसर म रोपे गीस छायादार अऊ फलदार पौधा
रायपुर, 12 जून 2020। महिला बाल विकास विभाग के सचिव श्री प्रसन्ना आर. ह राजधानी के माना कैम्प स्थित बाल सम्प्रेक्षण गृह अऊ बालगृह के निरीक्षण करके उहां काउंसलिंग, साफ-सफाई, संग कोरोना संक्रमण ले लइका मन के बचाव बर जरूरी दिशा-निर्देश दीन। श्री प्रसन्ना ह अपचारी लइका मन के नियमित काउंसलिंग उपर बल दीन अऊ कहिन के सॉकोलोजिस्ट नियमित रूप ले लइका मन के काउंसलिंग करके लइका मन म होवत सुधार के प्रगति के आंकलन करयं। उमन लइका मन बर बनाय गए भोजन ल चिखके ओखर गुणवत्ता के घलोक जांच करिन। ये दौरान विभाग के संचालक श्रीमती दिव्या उमेश मिश्रा अऊ विभागीय अधिकारी घलोक उपस्थित रहिन। निरीक्षण के समय सचिव, संचालक संग लइका मन अऊ अधिकारी मन ह सम्प्रेक्षण गृह अऊ बालगृह परिसर (बालक-बालिका) म छायादार अऊ फलदार वृक्ष लगाइन।
श्री प्रसन्ना ह अधिकारी मन ल दूर रखत सम्प्रेक्षण गृह म रहत बालक मन ल अकेला म मुलाकात करके उंखर समस्या मन अऊ मांग के संबंध म जानकारी लीन। उमन लइका मन ले भोजन व्यवस्था, खेल-कूद, उंखर हॉबी संग प्रकरण के स्थिति के संबंध म बताय बर कहिन। लइका मन ह अपन-अपन पसंद के कॉमिक्स, महापुरूष मन के जीवनी, स्वतंत्रता संग्राम संबंधी पुस्तक मन अऊ योगा मैट के मांग करिन जऊन ल जल्दी पूरा करे के आश्वासन सचिव ह दीन। ये दौरान संचालक श्रीमती मिश्रा ह पौधा मन ल सहेजे अऊ नियमित पानी दे बर लइका मन ल प्रेरित करिन। एखर संगेच लइका मन ल मास्क पहिने अऊ स्वस्थ्य संबंधी कोनो परेशानी होए म तुरंत सूचना देहे के संमझाईश दीन।
अधिकारी मन ह बताइस के शासकीय बाल सम्प्रेक्षण गृह अऊ ओखर से संलग्न शासकीय सुरक्षित स्थान (प्लेस ऑफ सेफ्टी) म विधि के उल्लघन करइया बालक मन ल प्रकरण के लंबित रहे के अवधि तक रखे जात हे। इहां लइका मन ल भोजन, घर, शिक्षा, प्रशिक्षण, नैतिक शिक्षा, परामर्श अऊ खेल-कूद के सुविधा निःशुल्क प्रदान करे जाथे। लइका मन म स्वस्थ्य आदत ल उभार करके ओ मन ल मुख्य धारा ले जोड़े के प्रयास करे जात हे। अभी हाल म माना कैम्प स्थित शासकीय बाल सम्प्रेक्षण गृह म 69 अऊ प्लेस ऑफ सेफ्टी म 16 अइसन कुल 85 लइका रहत हें। साल 19-20 म संस्था के 6 बालक मन ह हायर सेकेण्डरी परीक्षा म सफलता प्राप्त करे हें अऊ ये साल 9 लइका छत्तीसगढ़ माध्यमिक शिक्षा मण्डल अऊ 3 लइका ओपन स्कूल के परीक्षा म सम्मिलित होए हें। अइसनहे शासकीय बालगृह (बालक) म 39 लइका निवासरत हे। इहां के 22 लइका मन ल स्कूली शिक्षा ले जोड़े गए हे।
