बिहनिया 7:00 ले 11:00 बजे तक, एक लाख ले ज़्यादा नौनिहाल मन ल मिलही राहत
महासमुंद, सरलग बाढ़त गर्मी के सेती लइका मन के बेहतर स्वास्थ्य सुरक्षा ल देखत महिला अऊ बाल विकास विभाग ह आंगनबाड़ी केन्द्र मन के संचालन के समय म बदलाव कर देहे हे। अब आज सुकरवार 01 अपरेल ले अवइया 30 जून तक के संचालन के समय 6 घंटा घटाके 4 घंटा करे गए हे। पहिली बिहनिया 9:30 ले 3:30 बजे (6 घंटा) तक आंगनबाड़ी केन्द्र मन के संचालन करे जात रहिस। आज ले आंगनबाड़ी केंद्र बिहनिया 7:00 बजे ले 11:00 बजे (चार घंटा) तक लगही। आंगनबाड़ी कार्यकर्ता अऊ सहायिका मन ल 7:00 बजे ले पहिली आंगनबाड़ी केंद्र पहुंचना होही। ए बेरा म करीबन एक लाख ले ज़्यादा लइका मन ल गर्मी ले राहत मिलही। पाछू एक हफ्ता ले तापमान म अड़बड़ बढ़ोतरी होए हे।
ज़िला कार्यक्रम अधिकारी महिला बाल विकास श्री समीर पाण्डे ह बताइस के एक जुलाई ले फेर 9:30 ले 3:30 बजे तक आंगनबाड़ी केन्द्र मन के संचालन करे जाही। जिला म 1795 आंगनबाड़ी केंद्र हे। इहां लइका मन के दर्ज संख्या करीब एक लाख 10 हजार हे। ये मां 1656 आंगनबाड़ी केंद्र खुद के भवन म संचालित होवत हे। बाकी केंद्र किराया के भवन म संचालित हे। अभी आंगनबाड़ी केन्द्र मन के नौनिहाल मन ल तेज गर्मी ले बचाना हे। विभाग कोति ले अब गर्मी ल देखत आंगनबाडि मन के संचालन के समय म बदलाव कर दे गए हे। महिला अऊ बाल विकास विभाग ह एखर बर आदेश घलोक जारी कर देहे हे। आंगनबाड़ी कार्यकर्ता अऊ सहायिका मन ल लइका मन ल छुट्टी के बाद घर तक सुरक्षित छोडे बर घलोक कहे गए हे।