रायपुर, 04 जनवरी 2024। महिला अउ बाल विकास मंत्री श्रीमती लक्ष्मी रजवाड़े ह आज राजधानी स्थित शासकीय बालिका गृह, नारी निकेतन अऊ सखी सेंटर के एदुपहे जांच करिन। निरीक्षण के समय उमन विभागीय अधिकारी मन ल जरूरी दिशा-निर्देश दीन। उमन कहिन कि बालिका अऊ महिला मन ल हर जगा सुरक्षा के अहसास होना चाही, एखर बर उचित वातावरण अऊ जरूरी व्यवस्था होना चाही।
श्रीमती रजवाड़े ह बालिकागृह के नोनी मन ले बात करके उंखर दिनचर्या, पढ़ाई अऊ आन विषय उपर चर्चा करिन। उमन बालिका मन कोति ले तियार करे सजावटी सामान मन ल देखिन अऊ उंखर हौसला बढ़ाइन। श्रीमती रजवाड़े ह नारी निकेतन अऊ सखी सेंटर पहुंचके घलोक व्यवस्था मन के जायजा लीन अऊ महिला मन के हर संभव मदद बर कहिन।
