चिरंजीवी शिविर म महिला मन ल स्वास्थ्य के प्रति करे जात हे जागरूक

सूरजपुर, सूरजपुर मुख्यालय के मंगल भवन म चलत चिरंजीवी अभियान के सफल पहिली सत्र के बाद अब दूसर सत्र चालू कर दे गए हे पहिली सत्र म कई लइका जेन कुपोषित रहिन ओ मन ल स्वास्थ्य लाभ मिले हे अऊ माता मन ल स्वास्थ्य संबंधी जानकारी के संग बेहतर पालन पोषण के घलोक जानकारी देहे जात हे। कलेक्टर डॉ गौरव कुमार सिंह के निर्देशन जिला पंचायत सीईओ श्री राहुल देव के मार्गदर्शन अऊ जिला कार्यक्रम अधिकारी श्री चंद्रबेश सिंह सिसोदिया के नेतृत्व म चलाए जात ये चिरंजीवी अभियान ले निरंतर लइका अऊ माता मन ल स्वास्थ्य लाभ होवत हे।
इही कड़ी म दूसर सत्र म चिरंजीवी अभियान म अपन बेटा राजन सिंह उमर 4 साल ल लेके पहुंचे प्रभावती निवासी तिवरागुड़ी ह बताइस के ओखर बेटा के पेट म लंबे समय ले जोर से दरद होथे, जेखर सेती माता पिता दुनों ही परेशान रहिथें। चिरंजीवी म पहुंचे के बाद जिला कार्यक्रम अधिकारी श्री सिसोदिया ह उचित जांच सोनोग्राफी बर ओ ल जिला अस्पताल भेजिस जिहां निशुल्क सोनोग्राफी करे गीस। जांच म बालक राजन सिंह के पेट म छोटे-छोटे गांठ होना पाए गीस। जेखर उपचार बर डॉक्टर मन ह जरूरी दवाई देहे हें, अब प्रभावती अपन बेटा बर काफी खुश हे अऊ ओ ल पूरा विश्वास हे के जल्दीच वो पूर्ण रुप ले स्वस्थ हो जाही।
इही तारतम्य म चिरंजीवी म भर्ती लइका मन के माता मन ल प्रभारी परियोजना अधिकारी सुश्री दीपा बैरागी अऊ महिला अऊ बाल विकास विभाग के अधिकारी मन स्वास्थ्य के प्रति जागरूक करे गीस अऊ एनीमिया रोकथाम, डायरिया प्रबंधन अऊ पोष्टिक आहार के बारे म विस्तार ले बताए गीस।
ये दौरान जिला कार्यक्रम अधिकारी श्री चंद्रबेश सिंह सिसोदिया, जिला महिला अऊ बाल विकास अधिकारी श्रीमती प्रभा लकड़ा, परियोजना अधिकारी श्री गौरव गहरवार, श्रीमती सरिता सिंह अऊ आन अधिकारी कर्मचारी व मेडिकल स्टाफ उपस्थित रहिन।