नारायणपुर, 28 अप्रैल 2020। छत्तीसगढ़ म महिला समूह मन के बनाए मीठ-अम्मठ अमली कैंडी के सुवाद अब प्रदेश के संगें-संग परोसी राज्य के निवासी घलोक उठा सकहीं। राज्य शासन ह ग्रामीण अर्थव्यवस्था ल मजबूती देहे बर कई प्रकार के उदीम करत हे। इही कड़ी म महिला समूह मन ल वनोपज के प्रोसेसिंग काम ले जोड़े जात हे। ए समूह मन जंगल ले मिले अमली के वैल्यू एडीशन करके ‘खट्टी-मीठी’ अमली कैंडी तियार करत हें।
राज्य म संचालित नवा बिहान कार्यक्रम के अंतर्गत नारायणपुर जिला म महिला समूह मन ल इमली कैंडी बनाए बर आर्थिक सहायता उपलब्ध कराए गए हे। ए समूह मन जउन इमली कैंडी बनावत हें ते ह ‘अबूझमाड़ बिहान मार्ट’ म बिक्री बर जल्दी उपलब्ध कराए जाही। जिला प्रशासन के पहल म इमली कैंडी बनाए बर आन महिला स्व-सहायता समूह मन ल घलव प्रशिक्षण संग आन सुविधा देहे जात हे। ब्रेहबेड़ा ग्राम के मां गायत्री समूह ह इमली कैंडी बनाए के काम शुरू कर देहे हे। एखरे संग समूह कोति ले चावल अऊ बेसन के लड्डू घलोक तियार करे जात हे।
