फलदार अऊ सजावटी पौधा रइही सुरक्षित. 11 समूह के महिला मन ल रोजगार
सरगुजा, 26 जून 2020। राज्य सरकार कोति ले हरा-भरा अऊ सुंदर छत्तीसगढ़ बनाए के उद्देश्य ले बड़का पैमाना म वृक्षारोपण के तैयारी करे जात हे। प्रदेश सरकार कोति ले वन विभाग ल पांच करोड पौधा लगाय के लक्ष्य देहे गए हे। संगेच राजमार्ग अऊ नदी मन के करार म बड़ संख्या म पौधा लगाय के तैयारी करे जात हे। सरगुजा जिला म घलोक पर्यटन विकास के दृष्टि ले राम वन गमन रस्ता बर चिन्हिारी करे गए रामगढ़ के पहाड़ी उदयपुर अऊ मैनपाट म पथ-वृक्षारोपण करे जात हे। पौधा मन ल पशु मन ले सुरक्षित रखे बर बिहान स्व-सहायता समूह के महिला मन ट्री-गार्ड बना के रोजगार के साधन के रूप म अपनाए हें। सड़क के पाई म पथ-वृक्षारोपण के तहत लगइया फलदार अऊ सजावटी पौधा मन के देखभाल ए ट्री-गार्ड मन ले प्राकृतिक तरीका ले करे जा सकही।
लॉकडाउन के बेरा म एक कोति जिहां रोजगार अउ आजीविका के समस्या उपजत हे उहें स्व-सहायता समूह के महिला मन बर ट्री गार्ड निर्माण ह रोजगार के संगें-संग जीवन-यापन बर आय के प्रमुख स्रोत बनत हे। स्व-सहायता समूह के महिला मन आर्थिक सशक्तीकरण के दिशा म प्रगतिशील भूमिका निभावत हें। जेखर तहत जिला के 11 स्व-सहायता समूह के महिला मन कोति ले वृक्षारोपण ल ध्यान म रखत ट्री-गार्ड के निर्माण करे जात हे। समूह मन ल ट्री-गार्ड निर्माण बर वन विभाग कोति ले उचित दर म बांस उपलब्ध कराए जात हे। महिला मन जउन ट्री-गार्ड बनाए हें तेन ल 450 रुपए प्रति नग के दर ले वन विभाग ह बिसावत हे। स्व-सहायता समूह के महिला मन ल करीबन 100 रुपया प्रति ट्री-गार्ड के राशि आय के रूप म प्राप्त होवत हे। एखर से ओ मन ल अकतहा आमदनी मिलत हे।
