बिहान स्व सहायता समूह ले जुड़के महिला मन बनत हें लखपति
अम्बिकापुर, 10 अगस्त 2024। महिला मन ल आर्थिक रूप ले सशक्त अऊ आत्मनिर्भर बनाए बर छत्तीसगढ़ सरकार कोति ले बनाय गए योजना मन धरातल म सार्थक रुप लेवत हे। जिला के लखनपुर विकासखंड के रहइया श्रीमती मंजू राजवाड़े ह मेहनत अऊ दृढ़ संकल्प ले एक सफल उद्यमी बने के कहानी लिखे हे। वोखर कहानी ह कई महिला मन ल प्रेरित करे हे अऊ लखपति दीदी के रूप म ओ ह एक मिसाल बन गए हे।
लखपति दीदी श्रीमती मंजू राजवाड़े ह बताइस कि वोखर पति श्री रुपचंद राजवाड़े खेती किसानी के काम करथे। वोखर तीन लइका हे। वो ह बताइस कि पहिली वोखर आर्थिक स्थिति अतका अच्छा नइ रहिस। वो ह घर के काम म व्यस्त रहय। घर परिवार के जिम्मेदारी अऊ आर्थिक तंगी ले वो ह जूझत रहिस। इही बीच ओ ल छत्तीसगढ़ राज्य ग्रामीण आजीविका मिशन बिहान योजना के बारे म जानकारी मिलीस जेखर से वोखर जीवनशैली म बड़ बदलाव आइस। वो ह बताइस के गांव के 10 महिला मन के संग मिलके खुशी स्व सहायता समूह बनाइस। महिला समूह के माध्यम ले बैंक म खाता खोलके छोटे-छोटे बचत करे लगिन। सबसे पहिली ओ मन ल व्यवसाय बर आरएफ म 15 हजार रुपिया के सहायता मिलीस, जेखर से वो ह अपन कच्चा मकान म छोटकुन किराना दुकान खोलिस। कठिन परिश्रम अऊ दृढ़ संकल्प ले दुकान चल निकलीस। बैंक ले सरलग लेन-देन करे म ओखर क्रेडिट बाढ़त गे जेखर से लोन लेके वो ह अपन व्यवसाय ल बढ़ायाइस।
श्रीमती मंजू राजवाड़े बताथे के, गांव म छोट कन दुकान ले वो ह शुरुआत करे रहिस। आज किराना दुकान के संगे-संग उमन चप्पल जुता अऊ कपड़ा के घलोक दुकान खोल लेहे हे। मेहनत अऊ कठिन परिश्रम ले वो ह अपन पक्का मकान घलोक बना ले हे। छत्तीसगढ़ राज्य ग्रामीण आजीविका मिशन ले वोखर जीवनशैली म बड़ बदलाव आए हे। आज वोखर सालाना बचत तकरीबन एक लाख रुपए तक हो जाथे।
छत्तीसगढ़ शासन के बिहान योजना ले जुड़के श्रीमती राजवाड़े आज लखपति दीदी के लिस्ट म सामिल हे। वो ह महिला मन ल रोजगार अऊ स्वावलंबी बनाए बर मुख्यमंत्री अऊ प्रधानमंत्री के आभार व्यक्त करत अपन खुशी जाहिर करे हे। लखपति दीदी श्रीमती मंजू राजवाड़े के कहानी एक सच्ची प्रेरणा हे, छत्तीसगढ़ सरकार के महत्वाकांक्षी योजना ले जुड़के महिला मन अपन सपना ल पूरा करत हें।
