शासन के योजना मन ले सशक्त बनिस जशपुर के उद्यमी महिला लालमती

जसपुर, छत्तीसगढ़ सरकार कोति ले संचालित महिला सशक्तिकरण के योजना मन अब धरातल म सकारात्मक परिणाम देहे लगे हे। एखर एक प्रेरणादायी मिसाल हे जशपुर जिला के गम्हरिया ग्राम के श्रीमती लालमती, जे ह शासन के कई ठन योजना मन ले लाभ लेके आत्मनिर्भरता के मिसाल कायम करे हे। वो ह अपन दृढ़ संकल्प अऊ मेहनत ले न सिरिफ खुद के पहिचान बनाए हे, भलुक गांव के आन महिला मन ल घलोक प्रेरित करे हे।
श्रीमती लालमती के जीवन एक सादा मजदूर ले सफल उद्यमी बने के कहानी हे। जब ओ ह प्रजापति गौरी स्व-सहायता समूह ले जुड़ीस, तब ओ ल बिहान योजना के माध्यम ले शासन के योजना मन के लाभ मिलीस। वो ह उद्योग विभाग ले लोन ले के शटरिंग प्लेट के व्यवसाय चालू करिस अऊ बाद म जनवरी 2025 म प्रधानमंत्री मुद्रा योजना के तहत ऋण लेके अपन व्यवसाय ल विस्तार दीस।
आज श्रीमती लालमती तीर 200 ले जादा शटरिंग प्लेट हे, जेन ल ओ ह निजी भवन अउ प्रधानमंत्री अवास योजना के अंतर्गत निर्माणाधीन आवास के छत ढलाई बर किराया म देथे। फरवरी 2025 ले अब तक ए व्यवसाय ले ल लगभग 35,000 ले 40,000 रुपिया के आमदानी होए हे। ये आंकड़ा सरलग बाढ़त हे काबर के प्रधानमंत्री आवास योजना के तहत गांव म कई मकान के निर्माण काम अभी चलत हे।
श्रीमती लालमती ह  मुख्यमंत्री श्री विष्णु देव साय  के प्रति आभार प्रकट करत कहिस के, कहूं शासन के योजना मन के संग-साथ नइ होतिस, त मैं आज ए मुकाम तक नइ पहुंच पातेंव। शासन ह हमला हौसला दीस, साधन दीस अऊ नवा रद्दा देखाईस।
मुख्यमंत्री श्री विष्णु देव साय ह कहिन के हमर सरकार के ये दृढ़ संकल्प हे के ग्रामीण अंचल के महिला मन आत्मनिर्भर बनय अऊ आर्थिक गतिविधि मन म अग्रणी भूमिका निभावंय। बिहान, मुद्रा योजना अऊ प्रधानमंत्री आवास योजना जइसे योजना मन के माध्यम ले हम महिला मन ल न केवल वित्तीय सहयोग देवत हन, भलुक ओ मन ल प्रशिक्षण, तकनीकी सहायता अऊ बाज़ार तक पहुँच घलोक प्रदान करत हन। श्रीमती लालमती जइसे महिला मन छत्तीसगढ़ के नवा सामाजिक-आर्थिक चेतना के चिनहारी यें।छत्तीसगढ़ शासन के प्राथमिकता हे के हर महिला अपन पांव म खड़े हो सकंय, सम्मान के संग जीवन जियंए अऊ दूसर मन बर प्रेरणा बनंय।