कोरोना वायरस के संक्रमण ले बचाव बर धमतरी के ’बिहान’ के महिला मन करत हें सहसउंक काम

अब तक करीबन साढ़े आठ लाख रूपिया के मास्क बेंच डरिन

धमतरी, 14 मई 2020। कोरोना वायरस के संक्रमण ले बचाव बर जिला म जिहां जिला प्रशासन संग जनप्रतिनिधि, स्वयंसेवी संस्था अऊ आमजन अड़बड़ अकन सुरक्षा के उपाए करे म हे, उहें ’बिहान’ समूह के महिला मन घलोक ये काम मा अपन बड़का भूमिका निभावत हें। जानबा हे के कोरोना महामारी के संक्रमण ले बांचे बर स्वच्छता, साबून या हैण्डवाश ले हाथ धोवई के संगेच मास्क लगाना बिकट जरूरी हे। मास्क लगाय ले वायरस के फैले के संभावना कम होथे। जिला म एखर जरूरत ल ध्यान म रखत ’बिहान’ समूह के महिला मन ह मास्क तियार करे के ठाने रहिन।

मुख्य कार्यपालन अधिकारी जिला पंचायत श्रीमती नम्रता गांधी ह बताइस के छत्तीसगढ़ राज्य आजीविका मिशन ’बिहान’ के 48 स्वसहायता समूह के 329 महिला मन जिला म मास्क तियार करे के काम करे ल चालू करिन। ये काम म समूह के बहिनी मन ल स्वास्थ्य विभाग, खादी अउ ग्रामोद्योग विभाग, हाथकरघा विभाग अऊ स्वयंसेवी संस्था मन तकनीकी सहयोग प्रदाय करे ल तको चालू करिन। नम्रता के बताती महिला मन धीरे-धीरे करत अब तक एक लाख 552 मास्क तियार कर डरिन अऊ 15 रूपिया प्रति मास्क के कीमत ले 56 हजार 403 मास्क बेच तको डरिन। महिला मन मास्क के बिक्री स्थानीय बाजार, रेडक्रास, नगर पंचायत, पुलिस, महिला अउ बाल विकास, पंचायत अउ ग्रामीण विकास, स्वास्थ्य, विद्युत, वन अऊ कृषि विभाग ल करिन। एखर से ओ मन ल अब तक आठ लाख 46 हजार 45 रूपिया के आमदनी होए हे।