कोण्डागांव, 26 जुलाई 2020। राष्ट्रीय आजीविका मिशन बिहान ले जुड़े स्व सहायता समूह मन के महिला मन स्वरोजगार अउ आजीविका के नवा-नवा क्षेत्र मन म कामयाबी हासिल करत हें। ए महिला मन ह पशुपालन, दोनापत्ती अउ पोषक आहार निर्माण, ईट व्यवसाय, केंटीन संचालन, फेंसिंग तार निर्माण जइसे कई क्षेत्र मन म महारत हासिल करे हें। इही कड़ी म अब ए महिला मन ह मिठई बनाना शुरू कर देहे हें। ये व्यवसाय म जुड़े ले महिला मन के आय म बढ़ोतरी तो होहीच, संगेच स्थानीय मनखे मन ल रोजगार तको मिलही।
कोण्डागांव जिला म स्वसहायता समूह के 30 कोण्डागांव नारियल के बर्फी, लड्डू अउ केक बनावत हें। मिठई बनाए के बाद ओला बेंचे बर बाजर उपलब्ध कराए के घलोक कार्ययोजना बनाए गए हे। महिला मन ह बताइन के उमन नारियल के बर्फी, लड्डू अउ केक बनाए के प्रशिक्षण लेवत हें। पेकेजिंग अऊ मार्केटिंग के बारे म घलोक प्रशिक्षण लेवत हें। ओ मन सब ये नवा काम ल सीखके अड़बड़ उत्साहित हें अऊ एला व्यवसाय के रूप म घलोक अपनाना चाहत हें। बिहान समूह के महिला मन ल अचार, चिप्स, चॉकलेट बनाए के प्रशिक्षण घलोक देहे जात हे। मिठाई के जायका म घलोक रोजगार खोजे के ये उदीम खच्चित सहराए के लइक हे। मिष्ठान व्यवसाय म घलोक महिला मन सफलता अर्जित करहीं।
कोण्डागांव जिला के जलवायु नरियल के खेती के लइक हे । इहां नारियल के बहुतायत उपलब्धता हे। एखर अलावा कोपाबेड़ा स्थित नारियल विकास बोर्ड कोति ले स्थानीय किसान मन ल नरियल के खेती बर सरलग पंदोली देहे जात हे। नरियल स्वास्थ्य बर फायदेमंद तको होथे। खास बात ये हे के नरियल ले बने मिठई मन म मिलावट के संभावना नइ होवय।
