- 47 क्विंटल वर्मी कम्पोस्ट बेंच के 37 हजार रूपिया कमाइन
- अवइया बेरा म गोधन न्याय योजना ले समूह के महिला मन ल मिलही बड़का फायदा
नारायणपुर, 19 अगस्त 2020। जिला के स्व-सहायता समूह के महिला मन अपन आर्थिक संबलीकरण बर बुलंद हौसला के संग वर्मी कम्पोस्ट बनाए के काम म भिड़े हें। महिला मन अपन अऊ अपन परिवार के जीवन स्तर ल ऊंचा उठाए अऊ जैविक उपज ल बढ़ावा देहे बर लगन के संग काम करत हें। ए महिला मन ल समूह मन म जोड़के रकम-रकम के काम मन ले जोड़े गए हे अऊ वर्मी कम्पोस्ट खाद बनाए के प्रशिक्षण घलोक देहे गए हे। नारायणपुर विकासखंड के ग्राम भाटपाल के माँ दंतेश्वरी स्व-सहायता समूह के महिला मन ल वर्मी कम्पोस्ट बनाए के काम ले जोड़े गए हे। बिहान के तहत गठित ये समूह के महिला मन उछाह के संग गौठान मन म वर्मी कम्पोस्ट तियार करे के काम करत हें।
समूह के महिला मन के कहना हे के ओ मन अपन गाँव अऊ परिवार बर कुछ करना चाहथें। माँ दंतेश्वरी स्व-सहायता समूह, भाटपाल के महिला मन के बताती उमन अब तक कुल 47 क्विंटल वर्मी कम्पोस्ट खाद तियार करके विक्रय करे हें जेकर से उमन ल 37 हजार रूपिया लाभ होए हे। समूह के महिला मन के कहना हे के मुख्यमंत्री भूपेश बघेल ह गांव के आर्थिक विकास बर गौठान के निर्माण करिस अऊ गोधन न्याय योजना लागू करे हें तेकर से गोबर खरीदी होवत हे अउ वर्मी कम्पोस्ट बनाए बर गोबर तको बने सहिन मिल सकय। हमार गांव म गौठान तो बन गए रहिस फेर गोबर कम मात्रा म मिलत रहिस या कभू मिलतेच नइ रहिस जेकर से वर्मी कम्पोस्ट बनाए के काम सरलग नइ हो पात रहिस। गोधन न्याय योजना लागू हो जाय ले अब वर्मी कम्पोस्ट बनाए बर गोबर के कमी नइ होवत हे, अउ भरपूर मात्रा म गोबर मिलत हे। गोधन न्याय योजना म भाटपाल गौठान म 6 क्विंटल गोबर के खरीदी करे गए हे। ये गोबर ल वर्मी कम्पोस्ट खाद बनाए बर टांका म डारे गए हे। जेला खाद बने के बाद ओला निकाल के 8 रूपिया प्रति किलो के दर ले बेचे जाही।
महिला समूह के महिला मन पूरा लगन अउ मेहनत के संग गोठान म काम करत हें। उंकर मानना हे के गोधन न्याय योजना ले अवइया समय म महिला मन ल बनेच आर्थिक लाभ मिलही, जे ह उंकर परिवार के तरक्की म सहायक बनही।
