रायपुर, कोरबा पुलिस प्रशासन के संग सजग कोरबा सतर्क कोरबा के तहत बालिका अउ महिला सुरक्षा ले संबंधित मैत्री व्हाट्स ऐप हेल्पलाइन नंबर कलेक्टर श्री अजीत वसंत के उपस्थिति म जारी करे गीस, जेखर शुभारंभ वाणिज्य अउ श्रम मंत्री श्री लखन लाल देवांगन ह काली गांधी जयंती के अवसर म कलेक्ट्रेट सभागार म करिन। ए अवसर म श्री देवांगन ह कहिन कि कोरबा पुलिस ह अपराध नियंत्रण अउ सुरक्षा बर काम सुग्घर करत हे। इही कड़ी म महिला मन के संग होवइया छेड़छाड़ के घटना उपर रोक लगाय बर मैत्री हेल्पलाइन नंबर +91-9479282100 जारी करे गए हे। उमन कहिन कि ये हेल्पलाइन नंबर कानून व्यवस्था बनाए रखे बर अउ अपराध म नियंत्रण बर महिला मन बर लाभकारी साबित होही।
ए अवसर म पुलिस अधीक्षक श्री सिद्धार्थ तिवारी ह बताइस के बालिका अउ महिला मन के संग होवइया छेड़छाड़ के घटना, छिटाकसी आदि शिकायत मन के विसय म लोकलाज के डर ले महिला या बालिका मन पुलिस थाना म रिपोट दर्ज कराए ले संकोच करथें। अइसन स्थिति म मैत्री हेल्पलाइन नंबर म घटना के शिकायत तुरंत कर सकत हें। हेल्पलाइन नंबर म शिकायत मिले म 96 घंटे के भीतर अपराधी के विरूद्ध कार्यवाही करे जाही।