रायपुर, महिला स्व-सहायता समूह के महिला मन ह ये सिद्ध करे हें कि कहूं कोनो काम ल लगन ले करे जाए त ओखर फल अच्छा मिलथे। गौठान म काम करत महिला मन न सिरिफ आत्मनिर्भर बने हे भलुक कई ठन मंच म सम्मान घलोक पावत हें।
छत्तीसगढ़ शासन के महत्वाकांक्षी योजना “नरवा, गरूवा, घुरूवा अऊ बाड़ी“ के अंतर्गत जिला के गोकुल नगर,जोन 6 म 2.5 एकड़ म गौठान के निर्माण करे गए हे। इहां गोबर ल बेचे नइ जात हे भलुक एखर से कई प्रकार के जिनिस बनाए के काम महिला स्व-सहायता समूह ह करत हे। ए उत्पाद मन के बिक्री ले गौठान ल सालाना 30 लाख के आमदनी होत हे। जेखर से समूह के महिला मन आर्थिक रूप ले सशक्त बनत हें अऊ कोनो उपर निर्भर घलोक नइ हें। गौठान म 400 ले जादा देशी गाय हे जेकर से हर रोज़ करीब 3 हजार किलो गोबर मिलथे। ये गोबर के उपयोग करके इहां 30 ले जादा प्रकार के उत्पाद बनाए जात हे। अभी ये गौठान के स्व-सहायता समूह के महिला मन गोबर ले टाइल्स बनाए के काम म भिड़े हें।
इहां के उत्पाद बनाथे ये गौठान ल खास
गौठान के नवाचार ले बहुत अकन रोजगार पैदा होए हे। प्रत्यक्ष रूप ले गोबर बेचके तो मनखे मन ल लाभ होतेच हे संगेच गोबर ले जैविक खाद अऊ आन उपयोगी वस्तु मन के निर्माण करके महिला स्व. सहायता समूह लाभ तको कमावत हें। ये स्व सहायता समूह म 13 महिला मन काम करथें, जेन गोवंश के देखभाल के संगे-संग गोबर ले कई प्रकार के उत्पाद बनाथें। जेमे देशी गाय के गोबर ले, लकड़ी, कंडा, धुप, हवन सामान, खाद, गुलाल, मूर्ति, गमला, टाइल्स, जइसे अलग-अलग समान बनाए जाथे। गौठान म अइसन कई उत्पाद हे जेन दुनिया म पहली पईत बने हे जेमे गोबर के चप्पल, सूटकेस, घड़ि, पेंटिंग्स सामिल हे।
गौठान मन ले महिला मन आर्थिक रूप ले सशक्त होए हें अऊ संग म प्रदेश भर के महिला मन बर प्रेरणा घलोक बनत हें। राज्य शासन कोति ले घलोक आय बढ़ाए बर सरलग उदीम करे जात हे। जेखर से ए महिला मन के संग संग प्रदेश भर के महिला मन के उदीम ल बल मिलत हे। इही बल के सेती महिला मन न केवल अपन हुनर ल निखार के अपन खातिर आय के श्रोत बनावत हें भलुक देश भर के महिला मन बर मिसाल घलोक बनत हें।
गौठान ह दीस मुस्कल बेरा म सहारा
पहल स्व सहायता समूह के नोमिन पाल ह बताइस कि पति के निधन के बाद घर चलाना मुश्किल हो गए रहिस। 6 महीना अड़बड़ दिक्कत होइस। अब गौठान के जरिए गोबर ले रकम-रकम के सामान बनावत हे। एखर से महीना म करीबन 10 हजार रुपए कमा लेत हे। जेखर से अब वो आर्थिक रूप ले सशक्त हो गए हे अऊ अपन घर के जिम्मेदारी मन ल घलोक निभावत हे।
बजट के ब्रीफकेस ह देवईस चिन्हारी
छत्तीसगढ़ म 2021-22 के बजट बर गोबर के ब्रीफकेस रायपुर के गोकुल नगर गौठान म बने रहिस। पहल महिला स्व-सहायता समूह के नोमिन पाल ह समूह के आन महिला मन के संग एला तियार करे रहिस। छत्तीसगढ़ के बजट बर गोबर के ब्रीफकेस बनाए बर समूह के महिला मन ल मुख्यमंत्री भूपेश बघेल ह सम्मानित घलोक करे रहिन। उमन महिला मन ल प्रोत्साहित करत कहे रहिन कि आप मन के बनाय गे ब्रीफकेस के चर्चा पूरा देश भर म होवत हे।
गौठान मन ले मिलीस महिला मन ल एक नवा चिन्हारी
