बलौदाबाजार, 01अगस्त 2020। जिला पंचायत के निर्देश म बिहान समूह ले जुड़े महिला स्व सहायता समुह मन अपन घरेच म रंग बिरंगी राखी बनावत हें। पलारी विकासखण्ड के अंतर्गत ग्राम कोनारी म स्थित जय माँ अम्बे महिला स्व सहायता समूह ह अब तक 7 हज़ार राखी बना डरे हे। जेमां ले काल तक 5 हज़ार नग राखी बेंचा गए हे। जेकर बाज़ार मूल्य करीबन 75 हज़ार रूपिया हे। समूह के अध्यक्ष श्रीमती छवि बाई धुव्र ह बताइस के हमार समूह म कुल 12 सदस्य हे। सबो मन मिलके जुलाई महीना के शुरू ले ही राखी बनाए के काम करत हें। अब तक हमन कुल 7 हज़ार राखी बनाये हवन। हम मन एला बेचे बर गाँव म ही समूह ह दुकान घलोक खोले हे। संगेच कुछ सदस्य मन घर-घर जाके घलोक बेंचत हें। गाँव वाले मन इंकर बना राखी मन ल अड़बड़ पसंद करत हें। राखी ह कोरोना संकट के समय म हमन बर अकतहा आय के जरिया बन गए हे।
उमन आगू बताईन के हमार समूह ह राखी के अलावा मसाला, पापड़, आचार, सेनेटरी नैपकिन, वाशिंग पाउडर, साबुन, अगरबत्ती, गोबर के अगरबत्ती घलोक बनावत हे। ए सबो चीज मन के विक्रय ले हर महिना करीबन 70 हज़ार रूपिया के बिक्री हो जाथे। जेमां ले लागत मूल्य ल काटके मुनाफा ल सबो महिला सदस्य मन म बराबर बाट लेथन।
