दुर्ग 26 मार्च 2020। कोरोना वायरस के संक्रमण के रोकथाम अउ उपाय बर निगम भिलाई क्षेत्र के अंतर्गत अवइया महिला स्व सहायता समूह कोति ले कपड़ा ले मास्क तियार करे जात हे। जानकारी मिले हे के ये मास्क के वितरण अत्यावश्यक सेवा म लगे अधिकारी/कर्मचारी मन ल करे जाही। राष्ट्रीय शहरी आजीविका मिशन के नोडल अधिकारी तरुण पाल लहरे ह बताइस के करीबन 3000 मास्क तियार कर ले गए हे।
ये मास्क के वितरण निगम म कार्यरत अत्यावश्यक सेवा वाले अधिकारी अउ कर्मचारी मन ल करे जाही। मास्क बनाए बर के जुम्मेदारी संवेदना महिला स्व सहायता समूह ल देहे गए रहिस। समिति ह मास्क तियार कर लेहे हे अऊ तियार करे के बाद एला पूरा सैनिटाइज करके वितरण बर दे गए हे। ये मास्क ल फेर से उपयोग म लाय बर बने सहिन ले धोके सुखाए के बाद सैनिटाइज करके उपयोग म लाए जा सकत हे। महिला स्व सहायता समूह के महिला मन ह एला 2 ले 3 दिन म तियार करे हें। राष्ट्रीय शहरी आजीविका मिशन के अंतर्गत अवइया एरिया लेवल फेडरेशन के महिला मन मास्क तियार करे के काम घर म रहि के करत हें।