स्थानीय उत्पाद मन के संग करत हें आर्थिक तरक्की
मुख्यमंत्री ल महिला समूह के सदस्य मन ह भेंट करिन प्राकृतिक उत्पाद
रायपुर, छत्तीसगढ़ शासन कोति ले महिला मन के सशक्तीकरण बर सरलग उदीम करे जात हे। महिला मन घलोक राज्य के हर हिस्सा म स्वसहायता समूह मन के माध्यम ले आर्थिक तरक्की के नवा रद्दा तियार करत हें। एमां छत्तीसगढ़ के आखरी छोर म बसे कुसमी जइसे क्षेत्र के महिला मन घलोक सामिल हे। आज बलरामपुर जिला म भेंट मुलाकात कार्यक्रम के समय सामरी क्षेत्र के सीता महिला स्वसहायता समूह अऊ कुसमी क्षेत्र के दुर्गा महिला स्वसहायता समूह के महिला मन ह मुख्यमंत्री ले मुलाकात करिन। महिला मन मुख्यमंत्री ल समूह कोति ले बनाय गए उत्पाद ले भरे एक टोकरी गिफ्ट करिन। ये टोकरी म रागी के आटा, हल्दी पाउडर, धनिया पाउडर, सरसो के तेल अऊ अमली अचार रखे रहिस। महिला स्वसहायता समूह के सदस्य मन ह मुख्यमंत्री श्री बघेल ल उंखर कल्याणकारी योजना मन बर धन्यवाद देवत उंखर आभार प्रकट करिन।
