जगदलपुर, 19 अगस्त 2020। राज्य के एंव-छेंव अउ जंगल कोति के निवासी मन ल घलोक गोधन न्याय योजना ले लाभ अब मिले ल शुरू हो गए हे। बस्तर जिला के विकासण्ड बस्तर, बकावण्ड, जगदलपुर, तोकापाल, लोहंडीगुडा, दरभा, बास्तानार के 93 स्व-सहायता समूह के 930 महिला सदस्य मन वर्मी कम्पोस्ट बनावत हें। ए समूह मन जिला म पहिली चरण म बनाय गए 54 गौठान म 478 क्विटल ले जादा वर्मी कम्पोस्ट बना डरे हें। महिला मन ह एमां ले 442 क्विंटल वर्मी खाद बेचके 3 लाख 62 हजार रूपिया ले जादा आर्थिक लाभ प्राप्त कर डरे हें। महिला मन के ये उपलब्धि ले प्रेरित होके जिला के आन समूह मन के महिला मन घलोक वर्मी कम्पोस्ट बनाए के काम शुरू करे के तैयारी म जुट गए हें। महिला समूह मन के वर्मी खाद के खरीदी निजी संस्था अऊ स्थानीय बजार अउ किसान मन करत हें।
सुराजी ग्राम योजना के तहत् बस्तर जिला मे पहिली चरण म 54 अऊ दूसर चरण म 123 अऊ वनविभाग के 51 गोठान मन ल मिलाके कुल 274 गौठान के निर्माण करे जात हे। अभी हाल म 93 गौठान म 311 वर्मी बेड अऊ 365 वर्मी टांका स्थापित करे गए हे। छत्तीसगढ़ शासन के महत्वाकंाक्षी नरवा, गुरूवा, घुरूवा अऊ बाड़ी योजना के तहत राज्य के सबो गांव मन म गौठान के निर्माण करे जात हे। स्थानीय स्तर म रोजगार सृजित हो सकय एखर बर गोबर ले वर्मी खाद् बनाए बर राष्ट्रीय ग्रामीण आजीविका मिशन बिहान कोति ले गठित स्वसहायता समूह मन के चिन्हांकन करे गए हे।