मुख्यमंत्री श्री साय ह महिला कबड्डी विश्व कप के स्टार खिलाड़ी संजू देवी ल दीन बधाई

रायपुर, महिला कबड्डी विश्व कप के स्टार खिलाड़ी छत्तीसगढ़ के रहवइया संजू देवी ह पाछू बेरा म मुख्यमंत्री श्री विष्णु देव साय ले राजधानी रायपुर स्थित ऊंखर निवास कार्यालय म सौजन्य भेंट करिन।
मुख्यमंत्री श्री साय ह विश्व कप म उत्कृष्ट प्रदर्शन करके छत्तीसगढ़ अऊ देश के नाव रोशन करे म संजू देवी ल हार्दिक बधाई अऊ शुभकामना दीन। उमन कहिन के “आप ह महिला सशक्तिकरण के एक नवा मिसाल पेश करे हव। आप मन ल देखके प्रदेश के बेटी मन खेल जगत म अऊ जादा उत्साह के संग आगू बढ़हीं। ये उपलब्धि निस्संदेह अवइया पीढ़ी मन के खेल प्रतिभा ल निखारे म प्रेरक साबित होही।” मुलाकात के समय संजू देवी ह घलोक अपन जीवन यात्रा, संघर्ष, अऊ खेल ले जुड़े अनुभव मुख्यमंत्री श्री साय के संग साझा करिन।
जानबा हे के महिला कबड्डी विश्व कप के स्टार खिलाड़ी संजू देवी कोरबा जिला के केराकछार गांव के रहवइया हे। ओ ल महिला कबड्डी विश्व कप म मोस्ट वैल्यूएबल प्लेयर के खिताब घलोक प्राप्त होय हे। ये प्रतिष्ठित टूर्नामेंट 17 नवंबर ले 24 नवंबर के बीच बांग्लादेश के राजधानी ढाका म आयोजित करे गए रहिस।
मुलाकात के समय छत्तीसगढ़ युवा आयोग के अध्यक्ष श्री विश्व विजय सिंह तोमर, छत्तीसगढ़ कबड्डी संघ के प्रदेश अध्यक्ष श्री शशिकांत बघेल, कोषाध्यक्ष श्री सेवा राम साहू, पहिली कोच श्री अनुज प्रताप सिंह, अभी हाल कोच श्री दिल कुमार राठौर संग आन पदाधिकारी घलोक उपस्थित रहिन।