सांस्कृतिक धरोहर मन ल सहेजे के काम सबले अहम : मुख्यमंत्री श्री बघेल

रायपुर, अपन सांस्कृतिक मूल्य अऊ सांस्कृतिक धरोहर मन ल सहेजे के संगेच आर्थिक विकास के रद्दा हमन चुने हन, हमन अपन तीज तिहार परंपरा मन ल सहेजे के दिशा म काम करेन। इही कड़ी म भक्त माता कर्मा के जयंती म घलोक अवकाश सुरू करेन ये अवकाश के मांग सामाजिक जन मन ह नइ करे रहिन फेर हमला महसूस होइस कि भक्त माता कर्मा के भक्त मन बर ये बहुत अच्छा काम होही। ये संदेश मुख्यमंत्री श्री भूपेश बघेल ह दुर्ग जिला के ग्राम परसदा म साहू समाज के कार्यक्रम के अवसर म दीन। ये बेरा म उमन आदर्श विवाह के नव दंपति ल घलोक आशीर्वाद दीन। मुख्यमंत्री ह कुम्हारी म साहू समाज के सामुदायिक भवन बर 50 लाख रूपिया के घोषणा करिन।
मुख्यमंत्री ह कहिन कि सांस्कृतिक परंपरा मन ल सहेजे के संग आर्थिक विकास के रद्दा घलोक हमन अपनाएन। उमन कहिन कि हमर सांस्कृतिक मान्यता कृषि प्रधान अर्थव्यवस्था ले संबंधित हे अऊ ए मन ल बढ़ावा देके हम कृषि अर्थव्यवस्था ल मजबूत करत हे। मुख्यमंत्री ह कहिन कि शहरी विकास बर घलोक तेजी ले योजना मन शासन ह सुरू करे हे। कुम्हारी क्षेत्र म नगरपालिका के वार्ड मन बर 24 करोड़ रूपिया के विकास काम कराए जात हे। एखर संगेच कुम्हारी क्षेत्र म स्कूल मन के जीर्णोद्धार घलोक होही। मुख्यमंत्री ह कहिन कि राजिम म साहू समाज बड़का आयोजन करत हे अइसनहेच आयोजन मन ल ध्यान म रखत हमने 55 एकड़ जगह क्षेत्र के विकास बर निरधारित करे हन। इहां मंगल भवन बनाए जाही सामुदायिक भवन बनाए जाही अऊ क्षेत्र के विकास अइसे करे जाही ताकि सामाजिक जन ल सामाजिक कार्यक्रम करे म कोनो प्रकार के दिक्कत झ आवय।