बलौदाबाजार म लॉक डाउन म फंसे जांजगीर जिला के श्रमिक मन ल भेजे गीस घर

बलौदाबाजार, 27 अप्रैल 2020। कोरोना लॉक डाउन के अंतर्गत जिला म फंसे जांजगीर-चाम्पा जिला के 24 श्रमिक मन ल आज ऊंखर गांव-घर बर रवाना करे गीस। रवाना करे के पहिली स्वास्थ्य परीक्षण ले संतुष्ट होए के बाद ओ मन ल यात्री वाहन ले भेजे गीस। जानबा हे के राज्य सरकार ह राज्य के भीतर फंसे श्रमिक मन ल उंखर इच्छा के मुताबिक गृह जिला अउ गाँव भेजे के व्यवस्था करे ल जिला प्रशासन ल कहे रहिस। ये क्रम म जिला कलेक्टर श्री कार्तिकेय गोयल के हुकुम म एसडीएम अउ इंसिडेन्ट कमाण्डर सुश्री लवीना पांडेय ह मज़दूर मन के सकुशल घर वापसी बर तमाम इंतज़ाम करे गीस । एसडीएम सुश्री पाण्डेय ह ये विसय म बताए गीस के बलौदाबाजार तहसील के अंतर्गत ये मज़दूर मन ग्राम ठेलकी म पाछू करीबन एक महीने ले अस्थायी राहत शिविर मन म रूकवाए गये रहिस। जल संसाधन विभाग के अंतर्गत एक ठेकेदार ह नहर लाइनिंग के काम म ये सब काम म लगे रहिन। राहत अउ आपदा प्रबंधन विभाग कोति ले ठेकेदार के सहयोग ले बाकायदा शिविर म इकंर बर खाए-पीए अउ स्वास्थ्य परीक्षण के पुख्ता व्यवस्था करे गए रहिस। शिविर म घलोक बिना कोनो परेशानी के खुशी के संग जीवन-यापन करत रहिन। लाइनिंग काम म ये मनखे कुली, मिस्त्री, वाहन चालक, सुपरवाइजर आदि कई काम म लगे रहिन। जांजगीर जिला के अंतर्गत ग्राम लच्छनपुर, हनुमन्ता, गिधौरी, कुघरीटार,सकरेली खुर्द, भातमाहुल, सोनगुढा अउ धमनी ग्राम के मज़दूर सामिल हे।