- कई बछर तक सुरता रइही ये सफर
- चेहरा म छलकिस खुशी अऊ राहत के मुस्कान
- राजनांदगांव जिला के 268 श्रमिक अउ कबीरधाम जिला के 108 श्रमिक पहुंचिन
राजनांदगांव 12 मई 2020। छत्तीसगढ़ के भूंईया म पांव धरतेच मजदूर मन के चेहरा म भरोसा अऊ खुशी के आभा छा गए। रेल्वे स्टेशन म रेल के डब्बा मन ले ओसरी-पारी उतरत मजदूर मन बर आज के ये दिन नइ भूलाए वाले दिन बन गे। मुख्यमंत्री श्री भूपेश बघेल के उदीम ले ये सुखद परिणाम रहिस के हैदराबाद म कोविड-19 के सेती लॉकडाउन म फंसे मजदूर मन के आज भिनसरहा लिंगमपल्ली (हैदराबाद) श्रमिक स्पेशल ट्रेन ले राजनांदगांव सकुशल वापसी संभव हो सकिस।
हैदराबाद रोजी-मजदूरी बर गए खेमलाल ह मुख्यमंत्री श्री भूपेश बघेल ल शुक्रिया कहिन। उमन कहिन के मुख्यमंत्री ह अइसन कठिन परिस्थिति म हमर समस्या ल दिल ले महसूस करके हमला सही समय म बला लीस। हमर हिरदे म ये सफर के सुरता कई बछर तक बने रइही। हैदराबाद ले सपरिवार आए बिटावन बाई अउ मुकेश यादव ह कहिस के इहां सुरक्षित पहुंचके बहुत अच्छा लागत हे अऊ अब हम अपन घर डोंगरगढ़ विकासखंड के मुडिय़ा मोहारा जाबोन। जिहां हमर परिवार हमला अगोरत हे। हैदराबाद ले आए पंचराम अउ ओकर पत्नी अमीरन बाई अड़बड़ खुस दिखत रहिस। वो ह कहिस के लॉकडाउन म हम फंस गए रहेन अऊ वापस अपन घर आना चाहत रहेन। अइसन समय म जब ये श्रमिक स्पेशल ट्रेन के सूचना मिलीस त मन ल राहत मिलीस। कबीरधाम के श्रमिक प्रेमलाल साहू अउ वोखर पत्नी श्रीमती सुखमती साहू ह मुख्यमंत्री के घर वापसी बर हृदय ले धन्यवाद दीन। आज राजनांदगांव जिला के 268 श्रमिक अउ कबीरधाम जिला के 108 श्रमिक पहुंचिन। राजनांदगांव अउ कबीरधाम जिला के मजदूर मन के स्वास्थ्य परीक्षण तको करे गीस। राजनांदगांव के मजदूर मन ल रेल्वे स्टेशन ले रैन बसेरा बस ले लेजे गीस अऊ उहां स्वास्थ्य परीक्षण करे गीस। कबीरधाम जिला के मजदूर मन के स्वास्थ्य परीक्षण रेल्वे स्टेशन म ही करे गीस अऊ ओ मन ल कबीरधाम बर बस ले रवाना करे गीस। ये बेरा म अपर कलेक्टर श्री ओंकार यदु, एसडीएम राजनांदगांव श्री मुकेश रावटे, जिला प्रशासन के अधिकारी-कर्मचारी, स्वास्थ्य विभाग के टीम, पुलिस विभाग अउ रेल्वे पुलिस बल के अधिकारी-कर्मचारी उपस्थित रहिन।
