पत्रकार हित म लेहे गए निर्णय मन बर मुख्यमंत्री ल दीन धन्यवाद
रायपुर, मुख्यमंत्री श्री भूपेश बघेल ले आज रायपुर स्थित ऊंखर निवास कार्यालय म छत्तीसगढ़ श्रमजीवी पत्रकार संघ के प्रदेश अध्यक्ष श्री अरविंद अवस्थी के सियानी म पत्रकार मन के प्रतिनिधिमण्डल ह सौजन्य मुलाकात करिस। प्रतिनिधिमण्डल ह मुख्यमंत्री श्री बघेल के सम्मान करिस अऊ मुख्यमंत्री कोति ले पत्रकार मन के हित म लेहे गए कई अहम निर्णय मन बर ओ मन ल धन्यवाद ज्ञापित करिन।
कोरोना म मृत पत्रकार मनके परिजन मन ल आर्थिक सहायता राशि
श्री अवस्थी ह कहिन कि मुख्यमंत्री श्री बघेल प्रदेश पत्रकार मन के शुभचिंतक यें उमन एक संगी के जइसे प्रदेश के पत्रकार मन के हित म काम करत हे अऊ उंखर समस्या मन के लउहे निराकरण करत हें। श्री अवस्थी ह कहिन कि मुख्यमंत्री श्री भूपेश बघेल के सियानी म राज्य सरकार कोति ले मासिक समाचार पत्र के संपादक मन ल घलोक अधिमान्यता प्रदान करे गए हे संगेच अधिमान्यता नवीनीकरण के अवधि ल एक साल ले बढ़ाके दू साल कर देहे गए हे। कोरोना काल म पत्रकार संगी मन ल इलाज बर सहायता राशि देहे गीस अऊ कोरोना म मृत पत्रकार मन के परिजन मन ल आर्थिक सहायता राशि प्रदान करे गीस। प्रदेश के पत्रकार एखर बर मुख्यमंत्री श्री बघेल के प्रति आभारी हें। पत्रकार मन ह अपन कई ठन मांग के संबंध म ज्ञापन घलोक सौंपिन जेमां मुख्यमंत्री ह सहानुभूतिपूर्वक विचार करे के आश्वासन दीन। ये बेरा म संघ के महासचिव श्री विश्व दीपक राई संग प्रदेश के कई जिला ले आए बड़ संख्या म पत्रकारगण उपस्थित रहिन।
