अम्बिकापुर, कलेक्टर श्री कुंदन कुमार के निर्देशन अऊ मुख्य चिकित्सा अऊ स्वास्थ्य अधिकारी डॉ पीएस सिसोदिया के मार्गदर्शन म सनिच्चर के विश्व मच्छर दिवस मनाए गीस। एखर अंतर्गत मच्छर ले होवईया बीमारी मलेरिया, डेगू, फाईलेरिया, जापानी इंसेफेलाइटिस, चिकनगुनिया आदि ले बचाव अऊ नियंत्रण बर जिला अऊ विकासखण्ड स्तर म कई ठन कार्यक्रम आयोजित करे गीस। जन जागरूकता रैली, बैठक, स्कुल अऊ आश्रम म स्वास्थ्य शिक्षा, सोर्स रिडक्शन, बैनर प्रदर्शन अऊ कई ठन माध्यम ले प्रचार-प्रसार करे गीस।
जिला मलेरिया अधिकारी श्री राजेश गुप्ता ह बताइस कि मनुष्य म मलेरिया रोग के संचार बर मादा मच्छर उत्तरदायी हे। मच्छर म मनुष्य के भीतर रोग संचार करे के क्षमता होथे। विश्व म हर बछर लाखों लोगन के मौत मच्छर ले होवईया बीमारी मन के सेती हो जाथे। मच्छर ले बचाव बर घर म सुते के बेरा मच्छरदानी के परयोग करना चाहिये अऊ फूल आस्तीन के कपड़ा पहिरना चाहिये, दरवाजा, खिड़की मन म जाली लगाना चाहिये। घर म गमला, कुलर, टायर मन म जमा पानी ल हर एक हफ्ता म सफाई करना चाहिये। घर के आस-पास पानी जमा झन होन देना चाही, नाली मन के साफ-सफाई अऊ पानी के उचित निकासी होना चाहिये अऊ नियमित रूप ले कीटनाशक के छिडकाव करना चाही।
