‘रक्तवीर’ अभियान ह राजिम कुंभ म बनाइस विश्व रिकॉर्ड

रायपुर, 09 मार्च 2024। राजिम कुम्भ कल्प 2024 म डॉ. प्रियंका बिस्सा व्यास टीम, नेहरू युवा केंद्र, सामुदायिक स्वास्थ्य केंद्र मगरलोड अउ छत्तीसगढ़ नर्सिंग कॉलेज के सहयोगी युवा संगी मन कोति ले बड़का स्तर म निःशुल्क रक्त परीक्षण शिविर “रक्तवीर” स्वास्थ्य शिक्षा अउ जागरूकता अभियान के आयोजन करे गीस।
“रक्तवीर” अभियान ह विराट संत समागम म सिरिफ पांच दिन म 23,180 मनखे मन के ब्लड टेस्ट करके कार्ड बना के दीस जे ह नवा विश्व रिकॉर्ड बन गे। ए ब्लड टेस्ट कार्ड म हाइट (लम्बाई), वेट (वजन), ब्लड प्रेशर, शुगर, ब्लड ग्रुप , हीमोग्लोबिन, सिकलिंग अउ एच.आई.वी. के निःशुल्क जांच करे गीस। गोल्डन बुक ऑफ वर्ल्ड रिकॉर्ड के प्रतिनिधि सोनल शर्मा ह विधिवत पूरा जांच के बाद विश्व रिकॉर्ड के घोषणा करिन। मुख्यमंत्री के पत्नी श्रीमती कौशल्या देवी, धर्मस्व मंत्री श्री बृजमोहन अग्रवाल अउ गरियाबंद विधायक श्री रोहित साहू ह परीक्षणार्थी मन ल सम्मानित करिन।
स्वास्थ्य विभाग मगरलोड के बी.एम.ओं डॉ. शारदा ठाकुर ह बताइस कि परीक्षण करइया मनखे मन म 65 प्रतिशत मनखे मन ल बी.पी, शुगर के घलोक जानकारी नइ रहिस फेर रक्तवीर अभियान ले स्वास्थ्य जानकारी लाखों मनखे मन तक पहुँचीस। नेहरु युवा केंद्र जिला अधिकारी श्री अर्पित तिवारी, छ.ग. नर्सिंग के प्रशासनिक अधिकारी भारवी वैष्णव प्राचार्य कर्ष जी, गुरू डॉ वासु वर्मा ह सबो स्वयंसेवक मन म उत्साह बनाये रखे म प्रोत्साहित करिन।
एखर पहिली 2018 म ए अभियान भारत के पहला ब्लड टेस्ट कार्ड बने रहिस जेमां 11,551 मनखे मन के रक्त जांच करके ओ मन ल कार्ड देहे गए रहिस। एखर अंतर्राष्ट्रीय स्तर म घलोक प्रशंसा होइस । राजिम कुंभ 2024 म इटली, फ्रांस ले आए मनखे मन ह घलोक ए अभियान म अपन प्ररीक्षण कराइन।