केरल,कोच्चि। प्रसिद्ध गायक येसुदास के छोटे भाई 62 वर्षीय केजे जस्टिन के शव कोच्चि शहर के डीपी वर्ल्ड इंटरनेशनल कंटेनर टर्मिनल म मिले हे. पुलिस ह प्रथमदृष्टया आत्महत्या के आशंका जतात हुए पोस्ट मार्टम रिपोर्ट के बाद ही स्पष्ट तौर म कुछु कहे के बात करत हे.
जस्टिन बीते मंगलवार ले अपन घर ले लापता रहिस. जस्टिन अपन परिवार के संग काक्कानाड म अपन परिवार के संग किराए के घर म रहत रहिन. एक सगा ह जस्टिन के घर नइ लौटे म पुलिस म गँवाय के मामला दर्ज कराये रहिस. मुलावुकड पुलिस के अनुसार, बुधवार संझा के वालारपडम समुद्रतट म एक शव मिले रहिस. यही म पुलिस ह अनैसर्गिक मौत के मामला दर्ज करे रहिस. गँवाय आदमी के संग हुलिया मिले के शक म जांच करे गिस, बाद म सगा ह जस्टिन के शव ल चिन्हिस .
पुलिस जांच अधिकारी ह बताइस कि जस्टिन गंभीर आर्थिक संकट के सामना करत रहिस. एखरे सेती आशंका जतावत कि वो जानलेवा कदम उठाये होही. हालांकि, मौत के पीछू के कारण मन के खुलासा होना अभी बचे हे. पुलिस ह पंचनामा करे के बाद शव ल एर्नाकुलम अस्पताल म शिफ्ट कर देहे.
गुरतुरगोठ बर दिलीप कुमार
