- कलेक्ट्रेट गार्डन म नियमित योगाभ्यास के कक्षा के होइस शुभारंभ
रायपुर, महिला अऊ बाल विकास समाज कल्याण मंत्री श्रीमती अनिला भेंड़िया ह आज राजधानी रायपुर के कलेक्ट्रेट गार्डन म खुद योगा करके नियमित योगाभ्यास कक्षा के शुभारंभ करिन। छत्तीसगढ़ योग आयोग (समाज कल्याण विभाग) कोति ले आयोजित निःशुल्क योग प्रशिक्षण के अवसर म आयोग के अध्यक्षा श्रीमती अनिला भेंड़िया ह कहिन कि मुख्यमंत्री श्री भूपेश बघेल के नेतृत्व म हमर प्रदेश गढ़बो नवा छत्तीसगढ़ कोति आघू बढ़त हे। सरलग योगाभ्यास के कक्षा के संचालन योग आयोग के महत्वपूर्ण पहल हे। योग करे ले ज्ञान अऊ बुद्धि के विकास होथे। सबो आयु वर्ग के मनखे मन बर योग जरूरी हे। योग आयोग के अधिकारी मन ह बताइस कि मुख्यालय स्तर म एखर अकतहा 5 जगा अऊ हर एक विधानसभा स्तर म एक निःशुल्क योग प्रशिक्षण बर सरलग योगाभ्यास कक्षा शुरू करे के योजना हे।
मंत्री श्रीमती भेंड़िया ह बताइस कि सरकार ये योग प्रशिक्षण के माध्यम ले पूरा छत्तीसगढ़ ल स्वस्थ अऊ सुंदर बनाना चाहत हे। ये मा आप सब मन के भागीदारी अऊ सहयोग रहिही जेखर से हम आन मनखे मन ल स्वस्थ रहे बर मार्गदर्शन दे सकत हन। आप मन सब जानतेच हव कि ऋषि-मुनि मन ह घलोक योग के माध्यम अऊ रोग मन ले निजात पावत रहे हें। कई बड़का ले बड़का बीमारी योग ले दूर हो जाथे। योग करके रोग ले दूर रहे जा सकत हे। उमन कहिन कि आसपास के मनखे मन ल योग के महत्व बतावव ताकि हम सबो स्वस्थ्य रहन। श्रीमती भेंड़िया ह उपस्थित मनखे मन ल धन्यवाद देवत कहिन कि समय निकालके इहां आवव काबर के ये योगाभ्यास म आप मन के सहभागिता महत्वपूर्ण हे।
योगाभ्यास के समय वृक्षासन, कटीसौंदर्यासन, चक्कीआसन, भुजंगासन, मर्कटासन, हास्यासन अऊ शवासन आदि के योगाभ्यास कराए गीस। ये बेरा म मुख्य मास्टर ट्रेनर श्री छबीराम साहू ह प्राणायाम ले मन मस्तिष्क ल केंद्रित करके मृगी मुद्रा म अनुलोम-विलोम आसन ले शरीर ल स्वस्थ रखे बर योगाभ्यास के जानकारी दीन। ये बेरा म सचिव योग आयोग श्री एम एल पांडे, सीईओ जिला पंचायत डॉ. गौरव कुमार सिंह, उपसचिव श्री राजेश तिवारी, संयुक्त संचालक श्री भूपेंद्र पांडे संग बड़ी संख्या म मनखे मन ह योगाभ्यास करिस।