आठवां अंतर्राष्ट्रीय योग दिवस म होइस विशेष आयोजन, जनप्रतिनिधि मन संग सबो मनखे मन ह उछाह ले करिन योग
रायपुर, आठवां अंतर्राष्ट्रीय योग दिवस के मौका म प्रदेश के हर जिला म विशेष आयोजन होइस। जीवन ल रोगमुक्त अऊ स्वस्थ बनाए के उद्देश्य ले दैनिक जीवन म नियमित योगाभ्यास ल सामिल करे के संकल्प के संग सबो मन ह मनोयोग ले योग करिन। योग दिवस म रायपुर, राजनांदगांव, बिलासपुर, गौरेला-पेण्ड्रा-मरवाही, कोरबा, रायगढ़, जांजगीर-चांपा, बालोद, दंतेवाड़ा, कांकेर, सिहावा समेत प्रदेशभर म विशेष आयोजन होइस, जिहां महिला, पुरुष, लइका, सियान सबो मन ह बढ़-चढ़के भाग लीन अऊ योग के कई ठन अभ्यास करिन।
अंतर्राष्ट्रीय योग दिवस ल विशेष बनाए बर समाज कल्याण विभाग ह अंतर्राष्ट्रीय योग दिवस के आयोजन “मानवता बर योग” के थीम म चंदखुरी म करिस, जिहां 12 सौ ले घलोक जादा भाग लेवईया मन ह एक संग योग करिन। छत्तीसगढ़ गौ सेवा आयोग के अध्यक्ष डॉ. महंत रामसुंदर दास के मुख्य आतिथ्य म रायपुर के दूधाधारी मठ परिसर म “मानवता बर योग” के थीम म आयोजन होइस। छत्तीसगढ़ भू-संपदा विनियामक प्राधिकरण (रेरा) के अध्यक्ष श्री विवेक ढांड संग सायकस योग समूह के सदस्य मन ह रायपुर म योग मुद्रा करिन।
छत्तीसगढ़ के न्यायधानी बिलासपुर म बहतराई स्थित इंडोर स्टेडियम म संसदीय सचिव श्रीमती रश्मि आशीष सिंह के मुख्य आतिथ्य म योग फॉर ह्यूमिनिटी के थीम म आयोजन होइस। जांजगीर-चांपा जिला म संसदीय सचिव श्री चन्द्रदेव प्रसाद राय के मुख्य आतिथ्य म जिला स्तरीय मुख्य कार्यक्रम के आयोजन भीमा तालाब, जाज्वल्य देव द्वार जांजगीर म होइस। रायगढ़ म जिला स्टेडियम म ’मानवता बर योग’ थीम म सामूहिक योगाभ्यास करे गीस। इहां उच्च शिक्षा मंत्री श्री उमेश पटेल के मुख्य आतिथ्य म मनखे मन ह योग्याभ्यास के समय कई ठन आसन करिन। गौरेला-पेण्ड्रा-मरवाही जिला म विधायक डॉक्टर के. के. ध्रुव अउ मुंगेली जिला म छत्तीसगढ़ के प्रसिद्ध पर्यटन स्थल मदकूदीप म छत्तीसगढ़ राज्य पिछड़ा वर्ग आयोग के अध्यक्ष श्री थानेश्वर साहू के मुख्य आतिथ्य म आयोजन होइस।
अइसनहे बलौदाबाजार म योग आयोग के सदस्य श्री गणेश योगी के मुख्य आतिथ्य म कृषि उपज मंडी प्रांगण म 4 सौ ले जादा मनखे मन ह योग करिन। सिहावा म विधायक डॉ लक्ष्मी ध्रुव के मुख्य आतिथ्य म धमतरी स्थित नगर निगम के सामुदायिक भवन परिसर म बड़ संख्या म मनखे मन ह योगाभ्यास म हिस्सा लीन। महासमुंद जिला म ऐतिहासिक, पुरातात्विक अऊ धार्मिक महत्व के पर्यटन स्थल सिरपुर म जनप्रतिनिधि मन ह स्कूली लइका मन संग योगाभ्यास करिन। ‘योग फॉर ह्यूमैनिटी’ के थीम म राजनांदगांव स्थित कृषि मंडी प्रांगण म केंद्रित कार्यक्रम म छत्तीसगढ़ योग आयोग के सदस्य श्री रविन्द्र सिंह सामिल होइन। सिहावा म विधायक डॉ. लक्ष्मी ध्रुव के मुख्य आतिथ्य म धमतरी स्थित नगर निगम के सामुदायिक भवन परिसर म योगाभ्यास होइस। गंगरेल स्थित रविशंकर जलाशय, बाबू छोटेलाल श्रीवास्तव के गृह ग्राम कंडेल म घलोक योग दिवस के आयोजन होइस। बालोद जिला म गंगा मैया मंदिर प्रांगण म महिला अउ बाल विकास अऊ समाज कल्याण मंत्री श्रीमती अनिला भेंड़िया के मुख्य आतिथ्य म आयोजन होइस। कांकेर जिला म छत्तीसगढ़ विधानसभा के उपाध्यक्ष श्री मनोज मंडावी के मुख्य आतिथ्य म बड़ संख्या म मनखे मन ह योगाभ्यास करिन।
अंतर्राष्ट्रीय योग दिवस ल लेके पूरा प्रदेश म उछाह के माहौल दिखिस, हर वर्ग ह बढ़-चढ़के योगाभ्यास करिन अऊ योग ल स्वास्थ्य बर अड़बड़ जरूरी बताइन। योग दिवस म स्वस्थ जीवन के प्रति समर्पित होके सबो मन ह योगाभ्यास करिन। योग दिवस म जनप्रतिनिधि, अधिकारी-कर्मचारी, योग समिति के सदस्य मन, कई ठन सामाजिक संस्था, स्कूली लइका, सियान मन ह योग के कई ठन मुद्रा के प्रदर्शन करिन। ये बेरा म पद्मासन, वज्रासन, सिद्धासन, मत्स्यासन, वक्रासन, अर्ध-अर्धहलासन, हलासन, सर्वांगासन, विपरीतकर्णी, मकरासन, धनुरासन, भुजंगासन, शलभासन, उलटा नौकासन आदि योग्याभ्यास करे गीस।