रायपुर, 25 फरवरी 2021। छत्तीसगढ़ योग आयोग कोति ले राजधानी रायपुर के घड़ी चौक तीर, कलेक्टोरेट उद्यान परिसर म निःशुल्क योग कक्षा के संचालन करे जात हे। इहां योग आयोग के मास्टर ट्रेनर्स ह रोजेच भिनसरहा 6 ले 7 बजे तक योग सिखावत हे। रायपुर शहर के नागरिक उद्यान म निःशुल्क योग सीख सकत हें। जानबा हे के कोरोना संक्रमण के सेती कलेक्टोरेट गार्डन म चलत योग कक्षा बंद कर देहे गए रहिस। समाज कल्याण मंत्री श्रीमती अनिला भेंड़िया के पहल म एक फरवरी ले फेर योग कक्षा शुरू करे गए हे। योग आयोग कोति ले योग के माध्यम ले नागरिक मन ल शारीरिक अऊ मानसिक रूप ले स्वस्थ रखे के संग नशापान अऊ दुर्रव्यसन ले दूर करके सामाजिक बदलाव के उद्देश्य ले रोजेच निःशुल्क योग प्रशिक्षण देहे जात हे।
कृषि के नवा तकनीक ले वनांचल के किसान अपन आमदनी म करत हें इजाफा
सुकमा, 25 फरवरी 2021। छत्तीसगढ़ म कृषि के नवा तकनीक ह किसान मन ल समृद्धि के नवा रद्दा देखाए हे। प्रदेश के दूरस्थ जिला सुकमा जिला के उरमापाल के किसान भीमा ल समृद्धि के ये नवा रद्दा ल देखाय म कृषि विभाग के आत्मा योजना ह महत्वपूर्ण भूमिका निभाए हे। सुकमा म छिन्दगढ़ विकासखण्ड के किसान मन सबले जादा धान के खेती करथें। फेर अब ये क्षेत्र के किसान धान के अलावा आन फसल के माध्यम ले अपन आय म वृद्धि करत हें। भीमा मण्डावी जइसे युवा मन ह आधुनिक कृषि ल अपनाके न केवल खुद समृद्धि के राह म कदम बढ़ाए हें, भलुक क्षेत्र के युवा कृषक मन बर घलोक प्रेरणास्त्रोत अऊ मार्गदर्शक बनत हें।
