मुख्यमंत्री ह योगेश ल आईआईटी के पढ़ई बर 4 लाख रूपिया के दीन स्वीकृति
पढ़ई बर हर संभव सहयोग के भरोसा तको दीन
रायपुर, मुख्यमंत्री श्री भूपेश बघेल के सहृदयता ले गरीब परिवार के होनहार छात्र योगेश साहू बर आईआईटी बाम्बे म पढ़ाई करना अब संभव हो पाही। बलौदाबाजार जिला के भाटापारा निवासी छात्र योगेश साहू ह जेईई एडवांस के परीक्षा साल 2021 म ऑल इंडिया रैंक (ओबीसी) 241 पाए हे। ओखर दाखिला आईआईटी बाम्बे म होवत हे। योगेश साहू के पिता श्री गयाराम साहू वाहन चालक हे। उंखर मासिक आय करीबन 12 हजार रूपिया हे। योगेश साहू ह पीछू दिन मुख्यमंत्री श्री भूपेश बघेल ले मुलाकात करके ओ मन ल अपन परिवार के आर्थिक स्थिति के बारे म जानकारी देहे रहिस। योगेश ह बताइस के आईआईटी बाम्बे के फीस 4-5 लाख रूपिया हे, कमजोर आर्थिक स्थिति के सेती ओखर परिवार ये भार वहन करे म सक्षम नइ हे। योगेश ह आईआईटी के पढ़ाई बर मुख्यमंत्री ले आर्थिक सहायता करे के आग्रह करे रहिस। मुख्यमंत्री ह योगेश ल पढ़ई बर राज्य सरकार कोति ले हर संभव सहायता के भरोसा देहे हे। उमन योगेश साहू ल आईआईटी के पढ़ई बर 4 लाख रूपिया के राशि मंजूर करे हें। योगेश साहू ह मुख्यमंत्री ल ये घलोक बताइस कि सत्र 2018-19 म वो ह हाई स्कूल परीक्षा म 98 प्रतिशत अंक हासिल करके प्रदेश के प्रावीण्य सूची म दूसरा स्थान प्राप्त करे रहिस। मुख्यमंत्री ह योगेश साहू ल वोखर ये सफलता बर बधाई दीन अऊ पढ़ाई बर हर संभव सहयोग के भरोसा दीन। उमन योगेश ल उज्जवल भविष्य बर शुभकामना दीन।