बेमेतरा, 14 मई 2020। किसान नेता योगेश तिवारी ह आज संझा प्रेस विज्ञप्ति जारी करे हे तेमा उमन बेमेतरा जिला के किसान मन के दुख ल गोहरावत प्रदेश सरकार ले उंकर हित बर कुछ मांग करे हें। हम आप ल बता देवन के मुख्यमंत्री भूपेश बघेल ह आजेच वीडियो कांफ्रेंसिंग के जरिये पत्रकार मन संग गोठ बात करत किसान मन के हित म लेहे गए बड़का निर्णय के बारे म बताए हें जेमा टोकन के समस्या ल छोड़ के योगेश तिवारी के मांग मन ल सरकार मानत हे तइसे लागत हे।
योगेश तिवारी के बताती प्रदेश के कांग्रेसी सरकार ह अपन चुनावी घोषणा पत्र म कहे रहिस के छत्तीसगढ़ के अन्नदाता किसान मन के धान के एक-एक बीजा हम बिसाबोन फेर जब धान खरीदी के बेरा आइस तब रोजे-रोज नवा आदेश सोसाइटी के माध्यम ले धान विक्रय केंद्र के अधिकारी कर्मचारी मन ल देहे गीस। कर्मचारी मन दुविधा के स्थिति म स्वतंत्रता पूर्वक धान खरीदी नइ कर पात रहिन जेखर खामियाजा प्रदेश के अन्नदाता किसान मन ल उठाना परे हे।
योगेश तिवारी के बताती रोजेच नवा आदेश मिले के सेती धान खरीदी केंद्र के अधिकारी कर्मचारी मन सशंकित रहत रहिन, आज फेर नवा आदेश झन मिल जाय। काबर के सरकार ह कभू 15 कुंटल त कभू कम, अइसे अपन आदेश ल घेरी-बेरी बदलत रहिस। अन्नदाता किसान मन ल छले गीस, कहूं बारदाना के संकट बताके किसान मन के धान नइ खरीदीन त कहूं स्पष्ट आदेश नइ मिले के सेती धान ल नइ खरीदे गीस। धान खरीदी के आखरी म टोकन कटे ले घलोक धान के खरीदी नइ पाइस। ये सब किसान मन के संग विश्वासघात हे।
उमन कहिन के बेमेतरा जिला के छिरहा कठौतिया नांदघाट क्षेत्र के टोकन कटे किसान मन के धान आज तक नइ खरीदे गए हे। धान के एक-एक बीज के खरीदी करे के दुहाई देवइया सरकार बतावय के बांचे धान ल किसान कहां बेंचश्। अपन आप ल कृषक हितैषी बतइया ये सरकार सही मायने म अन्नदाता मन के शोषण ही करत हे। धान खरीदी के बाद धान के कीमत 25 सौ देहे के बात करइया प्रदेश के सरकार अंतर के राशि ल किसान मन के खाता म कब डारही ये घलोक सरकार कोति ले कोनो निश्चित दिशानिर्देश जारी नइ करे गए हे। एखर से साफ जाहिर हे के वो प्रदेश के किसान मन ल धोखा देना चाहत हे। जेखर सेती ये दिशा म गंभीरता ले विचार करत प्रदेश के किसान मन ल सरकार कोति ले करे गए वादा के मुताबिक 25सौ रुपया धान के किमत देहे अऊ जऊन किसान मन के टोकन कट गए रहिस हे उंखर धान ल लउहे खरीदे जाना चाही। छत्तीसगढ़ के किसान अभी तक ये प्रकार के अपन ऊपर होत अन्याय अऊ अत्याचार ल सहन करत धीरज के संग अपन किसानी म लगे हें। छत्तीसगढ़ के किसान कहूं धीरज खो दीन त का हाल होही, ये सरकार म बइठे मनखे मन ल गंभीरता ले सोचना चाही अउ तुरंतेच ये दिशा म निर्णय लेके लउहे किसान मन ल संतुष्ट करके बेमेतरा जिला के सबो सोसायटी मन के माध्यम ले खाद बीज के व्यवस्था करव।
छत्तीसगढ़ धीरे धीरे सामान्य कामकाज कोति आगू बढ़त हे: मुख्यमंत्री श्री भूपेश बघेल