बेमेतरा, 13 अप्रैल 2020। कोरोना के महामारी ले जनता ल बचाए बर सरकार के संगें-संग सुजानुक मनखे मन अपन-अपन कोति ले उदीम करत हें। अइसनहे बेमेतरा के किसान नेता योगेश तिवारी ह अपन साधन ले स्वंय के खरचा म बेमेतरा विधानसभा ल कोरोना के संक्रमण ले बचाए खातिर गली-गली म सैनेटाइजर के छिड़काव करत हें।
हमर संवाददाता अजय मिश्रा के बताती योगेश तिवारी ह स्वयं के पईसा ले सेनेटाईजर छिंचे वाला स्पेसल ट्रैक्टर बिसा के लाए हें अउ संगें संग दूसर एक ठन अउ गाड़ी म सेनेटाईजर मसीन लगा के बेमेतरा के गली-गली ल सेनेटाईज करत हें। बेमेतरा म आज फेर उमन शहर के कई वार्ड मन म सेनेटाईजर के छिड़काव करिन जेमा परशुराम चौक, सिंधी पारा, ब्राम्हण पारा, मोहभट्टा वार्ड जइसे सबो जगा ल सेनेटाइस करे गीस। किसान नेता योगेश तिवारी के कहना हे के मैं ह कोरोना माहामारी ल पुरा बेमेतरा विधानसभा क्षेत्र ले जड़ से खतम करे के बाना उंचाए हंव, ये काम म मैं अपन भूमिका एक स्वयं सेवक जइसे निभावत हंव। उमन आम जनता ले निवेदन करे हें के उमन अपन अऊ अपन परिवार के सुरक्षा के हमेसा ख्याल रखंय।
