धमतरी GG Digital News Desk, पहिली धान बेचे बर समिति के चक्कर काटे ला परय अउ कतको घन्टा लाइन मा खड़े होय ला परत रिहिस। फेर अब जमाना बदल गे हे। सरकार के ‘तकनीक’ ह किसान मन के काम ला एकदम आसान कर देहे हे। अब मोबाइल ऐप ‘टोकन तुंहर हाथ’ ले घर बइठे-बइठे धान बेचे के टोकन मिलत हे।
का कहिथे भागीरथी साहू?
धमतरी जिला के भटगांव के रहइया किसान भागीरथी साहू एखर जीता-जागता सबूत हे। भागीरथी भाई ह बताइस के वो मोबाइल ले घर बइठे ऑनलाइन टोकन कटाइस। एखर बर वोल समिति जाय के जरुरत नइ परिस। बिना कोनो भीड़-भाड़ अउ झंझट के वो ह सोरम उपार्जन केन्द्र मा जाके 20 कुंटल 60 किलो धान आसानी ले बेच दिस।
अपन मन के राजा: ए नवा सिस्टम के सबले बड़का फायदा ये हे के अब किसान ‘अपन मर्जी के राजा’ हे। ऐप के माध्यम ले किसान अपन सुविधा देख के धान बेचे के तारीख अउ समय खुद चुन सकत हें। एखर ले मंडी मा भीड़ घलो कम होय हे अउ पारदर्शिता (सफाई) घलो आए हे।
भागीरथी साहू ह कहिथे के ए व्यवस्था बहुत बढ़िया हे। वो ए पइसा के उपयोग अपन खेती-किसानी ला सुधारे अउ घर-परिवार के जरूरत पूरा करे मा करही। वो ह बाकी किसान भाई मन ला घलो मोबाइल ऐप के उपयोग करे के सलाह देवत हे। सरकार के ए पहल ले गाँव के किसान मन ला ‘स्मार्ट’ बनाए के काम होवत हे।