रायपुर, छत्तीसगढ़ म कृषि अउ संबद्ध क्षेत्र मन उपर आधारित नवा स्टार्टअप स्थापित करे के इच्छुक उद्यमी मन अउ नवाचारी युवा मन ल सफल स्टार्टअप के गुर सिखाए बर छत्तीसगढ़ बायोटेक प्रमोशन सोसायटी अउ सुभाष चन्द्र बोस इन्क्यूबेशन सेन्टर, रायपुर कोति ले आयोजित दू दिवसीय कार्यशाला के आज इहां समापन होइस। ए कार्यशाला म देश के विख्यात स्टार्टअप के खांटी जानकार मन ह नवाचारी स्टार्टअप स्थापित करे के रणनीति, संभावना, शासकीय नीति, स्टार्टअप स्थापित करे बर उपलब्ध सुविधा अउ अनुदान अउ स्टार्टअप स्थापित करे म अवइया कठिनाई अउ चुनौती मन के बारे म प्रतिभागी मन के मार्गदर्शन करिन। कार्यशाला म छत्तीसगढ़ के कई ठन विश्वविद्यालय अउ शैक्षणिक संस्थान मन म स्थापित इन्क्यूबेशन सेन्टर्स के प्रतिनिधि, स्टार्टअप संचालक, नवा उद्यमी अउ विद्यार्थी सामिल होइन।
कार्यशाला के समापन समारोह ल संबोधित करत मुख्य अतिथि कृषि विश्वविद्यालय के कुलपति डॉ. गिरीश चंदेल ह कहिन कि छत्तीसगढ़ म कृषि आधारित स्टार्टअप विशेषकर बायोटेक अउ फूड प्रोसेसिंग स्टार्टअप के व्यापक संभावना हे। उमन कहिन के छत्तीसगढ़ म प्रतिभा के कमी घलोक नइ हे अऊ इहां के बहुत अकन नवाचारी युवा उद्यमी मन ह स्टार्टअप्स स्थापित करे हें। एमां ले कुछ स्टार्टअप अड़बड़ सफल घलोक होए हे।
युवा उद्यमी मन ह जानिन, स्टार्टअप कइसे हे लगाना
