छोटे भाई ह करिस बड़े भाई के हत्या, फिर थाना म जाके खुद ल करिस सरेंडर

अभनपुर, 29 मई 2020। रायपुर जिला के गोबरा नवापारा म छोटे भाई ह बड़े भाई के धारदार हथियार ले निर्मम हत्या कर दिये हे. फिर थाना पहुंच के खुद ल सरेंडर कर दिस. हत्या के कारण आये दिन परिजन मन के संग मारपीट अउ विवाद के होना बताये जावत हे. मिले जानकारी के अनुसार वार्ड क्रमांक 21 म रहने वाला सलीम रिजवी ह बीते रात करीब 1 बजे होय विवाद म अपन बड़े भाई शमीम ल पहली सीढ़ी ले धक्का दिस अउ फिर चाकू ले ताबड़तोड़ हमला करके ओखर जान ले लिस. आरोपी सलीम के अनुसार शमीम शराब के नशा म अक्सर घरवाला मन के संग गाली-गलौज अउ मारपीट करे. कुछ दिन पहली ही वो अपन बीवी-बच्चा मन के संग मारपीट करके घर ले भगा दे रहिस. पुलिस के अनुसार गुरुवार-शुक्रवार के दरमियानी रात सलीम अउ शमीम के बीच जमके विवाद होइस अउ इही विवाद म छोटे भाई ह बड़े भाई के हत्या कर दिस. एखर बाद रात म वो खुद थाना पहुंच के अउ अपन भाई के हत्या करे के बात कहत हुए सरेंडर कर दिस. सलीम के बात मन ले सन्न पुलिसकर्मी तत्काल घटना स्थल म पहुंचिस अउ कमरा ल सील कर दिस. आज बिहनिया मृतक के परिजन मन के आगु पुलिस ह मर्ग कायम करके शव के पंचनामा करिस, फिर पोस्टमार्टम बर भेज दिस हे. वही आरोपी छोटे भाई सलीम रिजवी के खिलाफ आईपीसी के धारा 302 के तहत मामला दर्ज करके ओला गिरफ्तार कर लिये हे. फिलहाल पुलिस पूरा मामला के जांच करत हे.