रायपुर, 4 जुलाई 2020। राजधानी टाटीबंध म रिंग रोड नंबर दू म एक सड़क हादसा होइस जेखर सेती पैदल चलत युवक के आज एम्स अस्पताल म मउत होगे। ये घटना ह आमानाका थाना क्षेत्र के टाटीबंध के हे, जिहा पैदल चलत युवक ल एक अंजान गाड़ी ह टक्कर मार दे रहिस। जेखर सेती युवक के मउत होगे। मृतक के पहिचान बलौदाबाजार जिला के भाटापारा निवासी मुकेश कुमार डग्गर (31) के रूप म करे गिस। पुलिस मन ह मामला म टक्कर मार के फरार अज्ञात गाड़ी चालक के खिलाफ अपराध दर्ज़ घलो कर ले हे। आमानाका पुलिस थाना के अनुसार मुकेश कुमार डग्गर एक जुलाई के देर रात टाटीबंध रिंग रोड नंबर दू म, चंद्राकर पेट्रोल पंप के आगु मुख्य मार्ग ले गुजरत रहीस, फेर उल्टा दिशा ले तेज रफ्तार म आये अज्ञात गाड़ी के चालक ह टक्कर मार दीस। टक्कर लगे ले मुकेश के दुनो गोड़, जांघ अउ शरीर म गंभीर चोट आये म लोगन मन के मदद ले एम्स म भर्ती कराए गे रहिस, जिहा ओकर मउत होगे।
राजधानी म अंजान गाड़ी ह पैदल चलत युवक ल ठोकर मारिस, ईलाज के बेरा मौत
