- मुख्यमंत्री ह प्रोत्साहन स्वरूप सबो भाग लेवईया मन ल पांच-पांच सौ रूपिया देहे के घोषणा करिन
- तीन दिवसीय राज्य युवा महोत्सव के समापन
रायपुर, मुख्यमंत्री श्री भूपेश बघेल ह राजधानी रायपुर म 12 ले 14 जनवरी तक आयोजित राज्य युवा महोत्सव म युवा मन के जोश, उत्साह अऊ उंखर मांग ल देखत हर साल युवा महोत्सव के आयोजन के घोषणा करिन। ये आयोजन हर साल स्वामी विवेकानंद जी के जन्म दिन के अवसर म 12 ले 14 जनवरी तक होही। मुख्यमंत्री ह युवा महोत्सव म सामिल सबो भाग लेवईया मन ल प्रोत्साहन स्वरूप पांच-पांच सौ रुपए देहे के घलोक घोषणा करिन। मुख्यमंत्री श्री बघेल आज राजधानी रायपुर के साइंस कॉलेज मैदान म तीन दिन तक चलइया राज्य युवा महोत्सव के समापन समारोह ल मुख्य अतिथि के आसंदी ले सम्बोधित करत रहिन।
मुख्यमंत्री श्री बघेल ह कहिन कि मोर इच्छा रहिस कि तीन दिन आप मन के कार्यक्रम ल देखवं। आप मन के संग खेलके अपन बचपन ल सुरता करंव, फेर स्वास्थ्य ह संग नइ दीस। मुख्यमंत्री ह कहिन कि हमार मनखे मन के बीच म भाईचारा हे। हम कोनो गांव, जिला म रहन, हमर जऊन संबंध हे, जऊन भाईचारा अऊ एकता हे, वो मजबूती के संग बने रहिथे। इही उद्देश्य ले ये युवा महोत्सव के आयोजन करे गीस। एखर सफलतापूर्वक आयोजन बर उमन सबो ल बधाई अऊ शुभकामना दीन। उमन कहिन कि जऊन प्रकार राष्ट्रीय आदिवासी नृत्य महोत्सव के आयोजन होइस अऊ वोमा 1800 कलाकार सामिल होए रहिन, फेर ये युवा महोत्सव म 7000 ले जादा भाग लेवइया सामिल होइन। श्री बघेल ह कहिन कि हमार नौजवान मन के चेहरा म खुशी दिखत हे। उमन म प्रतिभा के कोनो कमी नइ हे। सवाल अवसर के हे, उत्साह के हे अऊ वो अवसर देवाए के काम छत्तीसगढ़ सरकार कोति ले करे गीस। मुख्यमंत्री ह कहिन कि आज जतना भाग लेवइया आए हें, उमन ल अतका बड़े मंच हो सकथे पहली बार मिले होवय। ए खातिर में ये कह सकत हंव कि ये आयोजन ले कलाकार अऊ युवा मन के आत्मविश्वास म वृद्धि होही।
ये बेरा म खेल अउर युवा कल्याण मंत्री श्री उमेश पटेल ह स्वागत उद्बोधन म कहिन कि ये आयोजन म सबो क्षेत्र मन ले मनखे सामिल होइन। ये आयोजन युवा मन ल जोड़े अऊ उंखर कला के प्रदर्शन के मंच देहे म सफल रहे हे। उमन नवा छत्तीसगढ़ निर्माण म युवा मन ल मिलके अपन योगदान देहे के आव्हान करिन।
समापन समारोह म वन अउर पर्यावरण मंत्री श्री मोहम्मद अकबर, स्कूल शिक्षा मंत्री डॉ. प्रेमसाय सिंह टेकाम, पर्यटन अउर संस्कृति मंत्री श्री अमरजीत सिंह भगत, विधानसभा उपाध्यक्ष श्री मनोज मंडावी, विधायकगण श्री मोहन मरकाम, श्री शिशुपाल सोरी, श्री धनेंद्र साहू, श्रीमती अनीता योगेन्द्र शर्मा, महापौर श्री एजाज ढेबर संग आन जनप्रतिनिधि अउर गणमान्य नागरिक, मुख्य सचिव श्री आर.पी. मंडल, पुलिस महानिदेशक श्री डी.एम. अवस्थी, प्रधान मुख्य वन संरक्षक श्री राकेश चतुर्वेदी, आन वरिष्ठ अधिकारी उपस्थित रहिन। आभार प्रदर्शन खेल अउर युवा कल्याण विभाग के सचिव श्री सिद्धार्थ कोमल सिंह परदेशी ह करिन।
4926