युवक ह फांसी लगाके करिस आत्महत्या, 20 मार्च के बेंगलुरु ले लहुटे रहिस घर

धमतरी, 30 मार्च 2020। जिला के सिहावा थाना क्षेत्र ले बड़का खबर आगु आवत हे। एक युवक ह फांसी लगाके आत्महत्या कर ले हे, युवक हाल ही म बेंगलुरु ले लहुटे रहिस। बताए जावत हे के जोन ल होम आइसोलेशन म रखे गे रहिस। बताये जावत कि सिहावा थानांतर्गत ग्राम टाँगापानी निवासी 35 वर्षीय गनपत मरकाम बोरवेल्स कम्पनी म काम करत रहिस।

इही सिलसिला म वो कुछ दिन बर बेंगलुरु गे रहिस। काम खत्म होय म वो 20 मार्च के बेंगलुरु ले अपन गांव वापस लहुट गे, दूसर राज्य ले लहुटे के सेती नियमानुसार ओला होम आइसोलेशन म रखे गे रहिस। लेकिन होम आइसोलेशन म रखे के बाद वो घरवाला मन ले ये कही के बाहर घूमें-फिरे निकल जावत रहिस कि ओला कुछ भी नई होय हे। अउ युवक के घर के बाहर गांव म आना जाना लगे रहय।

इही बीच गनपत के लाश आज बिहनिया गांव के तरिया के तिर सीताफल पेड़ म फांसी म लटके मिलिस। ये घटना ले पूरा गांव म सनसनी फैल गे हे। सूचना मिलत ही सिहावा पुलिस मौका म पहुंच चुके रहिस। पुलिस ह शव के पंचनामा करे के बाद ओला पोस्टमार्टम बर चीरघर पहुंचाइस। फिलहाल आत्महत्या के कारण के पता नई चल पाये हे। लेकिन होम आइसोलेशन म रखे युवक द्वारा ये तरह के आत्मघाती कदम उठाए जाये ले कई तरह के सवाल उठत हे।

लउछरहा..