अपन बीच मुख्यमंत्री ल पाके मगन होइन युवा, मुख्यमंत्री ल दीन बधाई

रायपुर, 12 दिसंबर 2023
मुख्यमंत्री श्री विष्णु देव साय काली जब वीआईपी रोड स्थित राम मंदिर पहुंचिन तब नर्सिंग कॉलेज के कुछ युवा घलोक मंदिर दर्शन बर आए रहिन। मुख्यमंत्री ल देखतेच युवा मन ह ओ मन ल जोर शोर ले बधाई दीन। उमन युवा मन ल धन्यवाद दीन। मुख्यमंत्री ह कहिन कि हमला छत्तीसगढ़ के विकास के अहम जिम्मेदारी मिले हे। आज एखर शुभ शुरुआत मंदिर दर्शन ले करे हन अऊ आप मन सबो ऊर्जा ले भरे युवा मन के संग मिले हे। ये मोर बर अड़बड़ खुशी के बात हे। विकसित छत्तीसगढ़ बनाए बर आप मन सबो युवा मन के सहयोग जरूरी हे।
युवा मन ह मुख्यमंत्री ल बधाई देवत कहिन कि छत्तीसगढ़ के नव निर्माण म हम आप मन के संग खड़े हन अऊ युवा पूरा उत्साह ले नवा साल ले छत्तीसगढ़ ल आगू ले जाय बर काम करहीं। मुख्यमंत्री ह युवा मन ल उज्जवल भविष्य के शुभकामना दीन। युवा मन ह कहिन कि हमन सरलग राम मंदिर आथन। आज अपन बीच मुख्यमंत्री ल पाके बहुत अच्छा लगिस। ये बहुत बढि़या बात हे कि मुख्यमंत्री ह अपन नवा कार्यकाल के शुरुआत भगवान श्री राम के दर्शन ले करे हें। जब भी कोनो शुरुआत आस्था के संग ले होथे त एखर परिणाम बहुत बढि़या होथे। हमला भारतीय परंपरा म सिखाया जाथे कि हर अच्छा काम के शुरुआत ईश्वर के दर्शन के संग होही त काम अच्छा होथे। आज मुख्यमंत्री ह श्री राम मंदिर म दर्शन करिन, ये बहुत अच्छा बात हे। युवा मन ह कहिन कि संयोग ले आज मुख्यमंत्री हमार बीच हें। हमला बहुत अच्छा लगिस। जानबा हे कि एमां ले बहुत अकन युवा अइसन रहिन जेमन पहली पइत अपन मतदान के परयोग करे रहिन।