रायपुर 10 अगस्त 2024/मुख्यमंत्री श्री विष्णु देव साय के पहल म छत्तीसगढ़ के युवा मन ल रोजगार ले जोड़े बर राज्य के 160 आईटीआई ल मॉडल आईटीआई के रूप म उन्नयन करे जात हे। एखर बर रोजगार अउ प्रशिक्षण विभाग कोति ले 484 करोड़ 22 लाख रूपिया के स्वीकृति जारी करे गए हे। मॉडल आइटीआई म उन्नयन के बाद युवा मन ल स्थानीय उद्योग के मांग के मुताबिक प्रशिक्षण मिल सकही।
राजस्व मंत्री श्री टंक राम वर्मा ह मॉडल आईटीआई म उन्नयन ल राज्य के युवा मन बर बड़का उपलब्धि बताए हें। उमन कहिन कि मुख्यमंत्री श्री विष्णु देव साय के मंशा के मुताबिक राज्य के आईटीआई ल मॉडल आईटीआई के रूप म अपग्रेड करे के योजना तैयार करे गए हे। उमन बताइन के योजना के पहिली चरण म प्रदेश के 160 आईटीआई बर 484.22 करोड़ रूपिया के तीन वर्षीय प्रस्ताव स्वीकृत करे गए हे। बलौदाबाजार के सकरी स्थित आईटीआई ल मॉडल आईटीआई बनाए के काम जल्दी शुरू होही। एखर बर सिडबी योजना के तहत 20 करोड़ 13 लाख रुपिया के राशि के स्वीकृति जारी करे गए हे।
राजस्व मंत्री श्री टंक राम वर्मा ह बताइस कि बलौदाबाजार के सकरी शासकीय आई टी आई के कई ठन ट्रेड के उन्नयन अऊ अधोसंरचना के काम करे जाही। शासकीय औद्योगिक प्रशिक्षण संस्थान म मशीन टूल्स अऊ उपकरण बर 3 करोड़ 23 लाख रुपिया जारी करे गए हे। ये मां कंप्यूटर, हार्डवेयर अऊ नेटवर्क मेंटनेंस बर 1 करोड़ 5 लाख रूपिया, इलेक्ट्रिशियन बर 75 लाख रूपिया, फीटर बर 46 लाख, मेकेनिक डीजल बर 44 लाख रूपिया अऊ वेल्डर बर 53 लाख रूपिया सामिल हे। अइसनहे सिविल वर्क म आईटीआई के नवा भवन निर्माण बर 3 करोड़ 44 लाख रूपिया, गार्ड रूम बर 7 लाख 42 हजार रूपिया, मोटर गाड़ी मन के पार्किंग बर 1 करोड़ 25 लाख रूपिया, स्टाफ क्वाटर्स निर्माण बर 11 करोड़ 78 लाख रूपिया अउ प्रवेश द्वार अऊ बाऊण्ड्रीवाल बर 34 लाख 80 हजार रूपिया के राशि स्वीकृत करे गए हे।
