युक्तियुक्तकरण ले मिलिस चार नवा गुरूजी
गुरूजी मन के पदस्थापना के खबर पाके खुश हे गांव के लइका
लइका मन के चेहरा म दिखे लगिस पढ़ई के ललक
बालोद, कभू गुरूजी के कमी ले जूझत बालोद ज़िला के छोट कन गांव तरौद म शिक्षा के एक नवा उम्मीद जागे हे। जिहां पहिली सिरिफ एके गुरूजी के भरोसा पूरा स्कूल चलत रहिस, अब इहां चार विसय विशेषज्ञ गुरूजी मन के नियुक्ति के खबर ले गांव म उत्साह के माहौल हे। छत्तीसगढ़ सरकार के ए पहल ह लइका, अभिभावक अऊ पूरा गांव म शिक्षा ल लेके एक नवा ऊर्जा भर देहे हे।
करीबन 60 पढ़ईया लईका वाला ये शासकीय हाईस्कूल बीते दू बछर ले गुरूजी मन के कमी ले जूझत रहिस। पढ़ई बाधित होत रहिस, एके गुरूजी ह सबो विषय के जिम्मेदारी उठावत रहिस। लइका मन के भविष्य ल लेके अभिभावक मन के चिंता बाढ़त जात रहिस। फेर मुख्यमंत्री श्री विष्णु देव साय के अगुवइ म युक्तियुक्तकरण के पहल ह ए अंधियारी म आशा के अंजोर भर दीस।
युक्ति युक्तकरण सही म गुरूजी अऊ संसाधन मन के असमान वितरण ल दूर करे के एक सुव्यवस्थित प्रक्रिया ये, जेमां जरूरतमंद स्कूल मन म गुरूजी मन के तैनाती करे जात हे। इही योजना के तहत अब तरौद के हाईस्कूल म चार नवा गुरूजी पदस्थ करे गए हे, जेन अलग-अलग विषय के हें। एखर से अब हर विसय के पढ़ाई सरलग अऊ गुणवत्ता पूर्ण हो सकही।
गांव के सरपंच श्री धर्मेंद्र कुमार रामटेके के बात ले गांव वाले मन के भावना झलकत हे। पहिली स्कूल म पढ़ई के स्थिति अच्छा नइ रहिस। जनभागीदारी समिति कई पइत गांव के युवा मन ल बलाके लइका मन के अध्ययन अध्यापन के व्यवस्था करत रहिस। शासन ह अब हमार गांव के स्कूल ल चार नवा गुरूजी देके लइका मन के अध्ययन-अध्यापन के बेहतर व्यवस्था कर देहे हे। एखर बर हम मुख्यमंत्री श्री विष्णु देव साय के आभारी हन। श्रीमती महेश्वरी ठाकुर, स्कूल के जनभागीदारी समिति के अध्यक्ष ह बताइस के शिक्षा लइका मन के अधिकार ये, अऊ शासन ह ये अधिकार ल लहुटाए हे। अब हमला चिंता नइ करना परय के हमार लइका मन ल कोन पढ़ाही।
स्कूल म गुरूजी मन के पदस्थापना के खबर पाके गांव के लइका मन घलोक अड़बड़ खुश हें। पढ़ाई ल लेके उंखर ललक अऊ उत्साह दिखाई देत हे। लइका मन ल हर विसय म अलग-अलग गुरूजी मिलना कोनो सौगात ले कम नइ हे। अब उमन बने पढ़ई लिखई करके डॉक्टर, इंजीनियर, गुरूजी या अधिकारी बने के सपना देखे लगे हें।
तरौद अब केवल एक गांव नइ रहिस, भलुक छत्तीसगढ़ के शिक्षा सुधार के उदाहरण बन गए हे। मुख्यमंत्री श्री विष्णु देव साय के अगुवई म युक्तियुक्तकरण के ये पहल पूरा जिला के स्कूल मन म चलत हे। शासन के स्पष्ट लक्ष्य हे के हरेक स्कूल म गुरूजी होवय, अऊ कोनो लइका शिक्षा ले वंचित झन रहय। शिक्षा के अंजोर जब दूर-दराज के गांव मन तक पहुंचथे, त ओखर असर सिरिफ किताब मन तक नइ रहय। वो पूरा समाज ल एक नवा दिशा देथे। ग्राम तरौद के ये बदलाव इही सकारात्मक सोच अऊ योजनाबद्ध प्रयास के नतीजा ये। छत्तीसगढ़ म शिक्षा के ये नवा बिहान, खश्चित पूरा प्रदेश ल प्रगति कोति ले जाही।
