लोक कला-हस्तशिल्प प्रदशर्नी-लोक साहित्य संगोष्ठी के होही समागम
रायपुर, राज्य स्तरीय युवा महोत्सव के आयोजन 12 ले 14 जनवरी 2022 तक साइंस कॉलेज मैदान रायपुर म करे जाही। ये पइत युवा महोत्सव म लोक कला प्रदर्शनी, हस्तशिल्प प्रदर्शनी के संगेच लोक साहित्य संगोष्ठी के घलोक आयोजन करे जाही। मुख्य सचिव श्री अमिताभ जैन ह आज मंत्रालय महानदी भवन ले वीडियो कॉन्फ्रेंसिंग के संग युवा महोत्सव के आयोजन के संबंध म तियारी मन के बारे म जानकारी लीन।
मुख्य सचिव ह युवा महोत्सव के सफल आयोजन बर स्थानीय स्तर म रायपुर जिला के कलेक्टर, एसपी अऊ आयुक्त नगर निगम के नेतृत्व म स्थानीय समिति बनाए के निर्देश दीन। उमन महोत्सव के आयोजन ले संबंधित जिम्मेदारी कई विभाग मन ल देहे हें। आयोजन स्थल म सुरक्षा व्यवस्था, यातायात नियंत्रण के काम गृह विभाग ल सौंपे गए हे। पर्यटन अउ संस्कृति विभाग कोति ले मुख्य मंच के निर्माण करे जाही। लोक निर्माण विभाग दर्शक ओसारी अऊ डोम निर्माण के काम देखही। भाग लेवईया मन ल कार्यक्रम स्थल तक पहुंचाए के जिम्मेदारी परिवहन विभाग ल देहे गए हे। लोक स्वास्थ्य यांत्रिकी अऊ नगर निगम आयोजन स्थल म पेयजल व्यवस्था सुनिश्चित करहीं। युवा महोत्सव म भाग लेहे अवईया मन के रूके के व्यवस्था अउ भोजन के व्यवस्था खेल अउ युवा कल्याण विभाग कोति ले करे जाही। भाग लेवईया मन ल जरूरी स्वास्थ्य सुविधा उपलब्ध कराए बर जीवन रक्षक दवई के संग चिकित्सक मन के टीम रइही। श्री जैन ह युवा महोत्सव के उद्घाटन अउ समापन कार्यक्रम के रूप रेखा तियार करे अऊ ओखर अनुमोदन कराए के निर्देश देहे हें। आयोजन स्थल म साफ-सफाई के काम नगर निगम कोति ले करे जाही। आयोजन स्थल म सुचारू विद्युत व्यवस्था के दायित्व ऊर्जा विभाग ल सौंपे गए हे। बैठक म अपर मुख्य सचिव श्री सुब्रत साहू, सचिव लोक निर्माण श्री सिद्धार्थ कोमल परदेशी, सचिव खेल अउ युवा कल्याण विभाग श्री एन.एन. एक्का, सचिव पर्यटन श्री अन्बलगन पी., सचिव लोक स्वास्थ्य यांत्रिकी श्री धनंजय देवांगन, सचिव वाणिज्य अउ उद्योग विभाग श्री आशीष कुमार भट्ट, संचालक स्वास्थ्य सेवाएं श्री नीरज कुमार बनसोड, रायपुर कलेक्टर श्री सौरभ कुमार, रायपुर पुलिस अधीक्षक श्री प्रशांत अग्रवाल, आयुक्त नगर निगम श्री प्रभात मलिक उपस्थित रहिन।
