युवा मन आगू बढ़के सकारात्मक भूमिका निभावयं कोरोना संक्रमण ल थाम्हे बर

रइपुर 6 अप्रैल 2021 मंगलवार। वैश्विक महामारी के ये दौर म युवा मन ल समाज म सकारात्मक भूमिका निभाए बर आगू आना चाही। राज्य म कोरोना संक्रमण के बाढ़त रफ्तार ल देखत आम जनता विशेष करके युवा, स्वयं सेवी स्ंस्था अउ शासन मिलके काम करही त एकर उपर नियंत्रण कर सकत हवन। युवा मन स्वयं जागरूक रहना हे कोरोना ले बांचे बर अउ अपन परिवार ल, संगवारी मन ल तको एकर तरीका बताना हे। सबो झिन ल कोरोना अनुकूल व्यवहार जइसे के मास्क लगाना, भीड़ वाले जगा म नइ जाना, साबुन पानी या सेनेटाइजर ले हाथ धोना आदि घेरी —बेरी बताना होही। संगे —संग युवा मन ल अपन दाई —ददा अउ दूसर सियान मन ल वैक्सीन के महत्व तको बताना होही अउ वैक्सीन ले जुड़े शंका मन ल लेके तको सही जानकारी देना होही अउ अपुष्ट जानकारी साझा करे ले बचना चाही। सही जानकारी राज्य शासन, स्वास्थ्य विभाग या भारत सरकार के अधिकृत वेबसाइट, विश्व स्वास्थ्य संगठन आदि के वेबसाइट आदि ले लेके ही सोशल मीडिया म साझा करना चाही। आम लोगन म ये प्रचारित करना होही कि वैक्सीन लगाए के पीछू तको मास्क लगाना अउ दूसर सावधानी मन जरूरी हावय काबर कि वैक्सीन के दूनो डोज लगे के पीछू तको 70-80 प्रतिशत सुरक्षा ही मिलथे। नवा निर्देश के पीछू वैक्सीन के पहली डोज के 4 ले 8 सप्ताह के पीछू दूसरइया डोज लगाए जावत हवय, दूसरइया डोज के 15 दिन पीछू शरीर म एंटीबाडी बनथे, इही एंटीबाडी शरीर ल सुरक्षा देथे, तब तक अउ ओकर पीछू तको संक्रमण ले बांचे बर कोविड अनुकूल व्यवहार करना जरूरी हवय, ये प्रचारित करना होही।